لاہور(نیوزڈیسک) زمبابوے کے خلاف سیریز کی تیاریوں کے لئے قومی کرکٹ ٹیم کا تربیتی کیمپ قذافی اسٹیڈیم لاہور میں شروع ہوگیا۔ قومی کرکٹ ٹیم کے ہیڈکوچ وقار یونس کی زیر نگرانی ہونے والے کیمپ 20ستمبر تک جاری رہے گا ۔ گزشتہ روز تربیتی کیمپ میں کھلاڑیوں نے زمبابوے کے خلاف تین ون ڈے اور دو ٹی ٹونٹی میچز کی سیریز کی تیاریوں کے لئے پہلے فٹ بال میچ کھیلا اور ور بعد ازاں فیلڈنگ اور بیٹنگ کی پریکٹس کی۔تربیتی کیمپ آج ( جمعہ ) کو بھی جاری رہے گا ۔ تربیتی کیمپ کے موقع پر میڈیا سے گفتگو کرتے ہوئے قومی کرکٹ ٹیم کے مایہ ناز آل راﺅنڈر شعیب ملک نے کہا کہ قومی ٹی ٹونٹی ٹورنامنٹ میں کارکردگی کو بہتر بنانے کا موقع ملا، زمبابوے کے خلاف اچھی پرفارمنس کا مظاہرہ کروں گا ۔ سیریز آسان نہیں ہو گی لیکن ٹیم کو جیتنے کے لئے سخت محنت کرنا ہو گی ۔ انہوں نے کہا کہ آئی سی سی کی جانب سے محمد حفیظ کی بولنگ پر پابندی سے ٹیم کو فر ق پڑا ہے ۔محمد حفیظ ٹیم کے پانچویں بولر تھے لیکن دیگرآل راﺅنڈر کمی کو پورا کرنے کی کوشش کریں گے اورمیری دعا ہے کہ قومی ٹیم کے آل راﺅنڈر ،بولر اور بلے بازآئی سی سی رینکنگ میں ٹاپ پوزیشن حاصل کریں ۔ایک سوال کے جواب میں انہوں نے کہا کہ میر ا دل پاکستانی ہے اور میری خواہش ہوتی ہے کہ پاکستان کا نام پوری دنیا میں روشن ہو ۔ شعیب ملک نے کہا کہ اپنی بیوی ثانیہ مرزا کی ٹینس میں اچھی پرفارمنس پر فخر محسوس کرتا ہوں ۔ثانیہ مرزا کا یو ایس اوپن ویمن ڈبل ٹینس ٹورنامنٹ جیتنا بے مثال کامیابی ہے ۔