اسلام آباد (این این آئی)گوجر خان کی نوجوان رہنما چیئرمین گرین ٹیم گوجر خان ملک طیب اعوان اور ملک نوشی نے بدھ کے روز اسلام آباد میں اسپیکر قومی اسمبلی راجہ پرویز اشرف سے ملاقات کی جس میں انہوں نے اپنی پوری برادری اور دوستوں سمیت پاکستان پیپلز پارٹی میں شمولیت اختیار کر لی۔ اس موقع پر اسپیکر قومی اسمبلی راجہ پرویز اشرف نے ملک طیب اعوان اور ان کی برادری کا شکریہ ادا کرتے ہوئے کہا کہ ان کی پارٹی میں شمولیت سے ہماری پارٹی مزید مضبوط ہوگی اور مل کر علاقے کی فلاح و بہبود کے لیے مزید بہتر طریقے سے اپنی ذمہ داریاں ادا کریں گے-
انہوں نے کہا کہ پاکستان پیپلز پارٹی عوامی مسائل کے حل اور روزگار کی فراہمی پر یقین رکھتی ہے۔انہوں نے کہا کہ گوجر خان کی عوام نے ہمیشہ انہیں عزت بخشی ہے۔انہوں نے کہا کہ اسی جذبے کے ساتھ وہ بھی عوام کے مسائل کو ان کی دہلیز پر حل کرنے پر یقین رکھتے ہیں۔انہوں نے کہا کہ نوجوان قیادت کی پارٹی میں شمولیت سے پارٹی پہلے سے زیادہ مضبوط ہو گی۔ اس موقع پر ملک طیب اعوان نے گفتگو کرتے ہوئے کہا کہ راجہ پرویز اشرف کی ملک کے لیے پیش کی جانے والی خدمات بالخصوص علاقے کی ترقی اور خوشحالی کے لیے اٹھائے گئے اقدامات ناقابل فراموش ہیں۔
انہوں نے کہا کہ راجہ پرویز اشرف نے بطور سابق وزیراعظم اور اسپیکر قومی اسمبلی علاقے کی تعمیر و ترقی کے لیے اور پسماندگی کے خاتمے کے گراں قدر خدمات سر انجام دی ہیں جس سے متاثر ہو کر انہوں نے اپنی برادری کے ہمراہ پاکستان تحریک انصاف کو چھوڑ کر پیپلز پارٹی میں شمولیت اختیار کرنے کا فیصلہ کیا ہے۔انہوں نے اس امید کا اظہار کیا کہ ان کی پیپلز پارٹی میں شمولیت علاقے کی عوام کے لیے اچھا شگون ثابت ہو گا اور وہ راجہ پرویز اشرف کے شانہ بشانہ علاقے کی ترقی اور خوشحالی کے لیے اپنا بھرپور کردار ادا کریں گے۔ اس موقع پر علاقے کے سیاسی رہنما راجہ خرم پرویز اور راجہ عرفان عزیز ،حاجی ریاض اور مرزا نذر بھی موجود تھے۔
