لاہور ( این این آئی) پاکستان مسلم لیگ (ق) کے صدر چوہدری شجاعت حسین نے کہا ہے کہ پولیس نے جو طریقہ کار اپنایا وہ قابل قبول نہیں ، معاملے کے پیچھے جو بھی ہے حکام بالا اسے کیفر کردار تک پہنچائیں ، پاکستان بہت پریشانیوں میں گھرا ہوا ہے، کچھ لوگ واقعات کو غلط رنگ دے کر پاکستان میں عجیب کیفیت پیدا کرنا چاہتے ہیں،موجودہ معاشی صورتِ حال میں بڑھتی قیمتیں کنٹرول کرنے کے لیے قومی سطح پر کمیٹی تشکیل دی جائے۔

ان خیالات کا اظہار انہوں نے میڈیا سے گفتگو کرتے ہوئے کیا ۔ چوہدری شجاعت حسین نے کہا کہ ایسی بات نہیں کرنا چاہتا جس سے ملکی سطح پر معاملات مزید خراب ہوں، پاکستان بہت پریشانیوں میں گھرا ہوا ہے، کچھ لوگ واقعات کو غلط رنگ دے کر پاکستان میں عجیب کیفیت پیدا کرنا چاہتے ہیں۔میں اس رات کو پیش آنے والے واقعے پر روشنی ڈالوں گا، پولیس پرویز الٰہی کے گھر گئی تو انہیں بتایا گیا کہ پرویز الہی چوہدری شجاعت کے گھر ہیں، پولیس والے پرویز الہی کے گھر کو چھوڑ کر میرے گھر کی طرف دوڑ پڑے۔

چوہدری شجاعت نے بتایا کہ پولیس میرے دروازے پر پہنچی تو دونوں بیٹے دروازے کے دوسری طرف تھے، پولیس والے آگے بڑھ رہے تھے تو میرے دونوں بیٹوں نے انہیں روکا، پولیس نے دروازہ توڑنے کی کوشش کی، دروازے کے شیشے ٹوٹ گئے، مگر دروازہ نہ ٹوٹ سکا۔انہوں نے بتایا کہ میرے دونوں بیٹے اس صورتِ حال میں زخمی ہو گئے، چوہدری سالک کے ہاتھ پر ٹانکے لگے، 2 گھنٹے کی کوشش کے بعد پولیس دروازے سے واپس گئی۔پاکستان مسلم لیگ (ق) کے صدر نے بتایا کہ پولیس والوں سے سوال کیا گیا کہ کس کیس میں یہ سب کچھ کیا جا رہا ہے؟ پولیس نے بتایا کہ گجرات میں سڑکوں کے تعمیری ٹھیکوں میں اربوں روپے کمیشن کے الزامات ہیں، انٹرنیشنل فرم سے کمیشن کے طور پر اربوں روپے وصول کرنے کے بھی الزامات ہیں۔

انہوں نے کہا کہ پولیس نے بتایا کہ اس سے زیادہ تفصیلات ہمارے پاس نہیں، میرا یا میرے دونوں بیٹوں کا ایسے کسی معاملے سے کبھی کوئی تعلق نہیں رہا، اس سارے معاملے پر جو طریقہ کار اپنایا گیا وہ قابلِ قبول نہیں، جس طرح بکتر بند گاڑی کے ساتھ مین گیٹ توڑا گیا، میں سختی سے مذمت کرتا ہوں۔

چوہدری شجاعت حسین نے کہا کہ اس معاملے کے پیچھے جو بھی ہے حکامِ بالا اسے کیفرِ کردار تک پہنچائیں، میں کسی اور موقع پر تفصیل سے بات کروں گا، دونوں بیٹوں سے کہا ہے کہ موجودہ صورتِ حال میں صبر کا دامن مضبوطی سے تھامے رہیں۔

یومِ مزدور کے حوالے سے انہوں نے کہا کہ پاکستان مسلم لیگ نے ہمیشہ مزدوروں کے لیے آواز اٹھائی ہے، موجودہ معاشی صورتِ حال کے پیشِ نظر مزدوروں کا کوئی پرسانِ حال نہیں، مزدور طبقے کو کسی دور میں اہمیت نہیں دی گئی، بڑھتی قیمتیں کنٹرول نہ کرنے سے ملک میں بے پناہ مہنگائی میں اضافہ ہوا۔

صدر پاکستان مسلم لیگ چوہدری شجاعت حسین نے کہا کہ مہنگائی نے ہر بندے کی کمر توڑ دی ہے، روز مرہ کی بڑھتی ہوئی قیمتوں نے سب کو متاثر کیا ہے، قیمتیں کنٹرول کرنا وقت کی اہم ضرورت ہے، قیمتیں کنٹرول کرنے کے لیے قومی سطح پر کمیٹی تشکیل دی جائے۔