لندن (این این آئی)پاکستان مسلم لیگ (ن) کے قائد اور سابق وزیراعظم نواز شریف نے کہا ہے کہ اللّٰہ تعالیٰ کا بڑا احسان ہے کہ اس نے اپنے گھر بلایا،پی ٹی آئی کی ڈیمانڈ گزشتہ 20 برس سے سب کے سامنے ہیں، تحریک انصاف کی ڈیمانڈ کا کوئی سر پاؤں نہیں ہوتا۔

جمعرات کو میڈیا سے گفتگو میں سابق وزیراعظم نے کہا کہ کافی عرصہ کے بعد حاضری کا موقع ملا،پاکستان کی سلامتی کیلئے دعائیں کیں، اللّٰہ پاکستان پر رحم کرے۔نواز شریف نے کہا کہ پی ٹی آئی کی ڈیمانڈ گزشتہ 20 برس سے سب کے سامنے ہیں، تحریک انصاف کی ڈیمانڈ کا کوئی سر پاؤں نہیں ہوتا۔قبل ازیں پاکستان مسلم لیگ (ن) کے قائد نواز شریف سے وزیراعظم کے معاون خصوصی عون چوہدری نے لندن میں ملاقات کی، جس میں پاکستان کی سیاسی صورتحال اور ملکی معاملات پر بات چیت کی گئی۔

عون چوہدری نے نواز شریف کو جہانگیر ترین کا پیغام پہنچایا اور نیک خواہشات کا اظہار کیا۔اس موقع پر عون چوہدری نے کہا کہ پاکستانی عوام کی خواہش ہے کہ آپ جلد صحتیاب ہو کر پاکستان آئیں، آپ کی قیادت میں پاکستان نے پہلے بھی ترقی کی تھی۔ وزیراعظم کے معاون خصوصی نے کہا کہ ملکی معاملات کو بہتر انداز سے چلانے کی آپ میں صلاحیت ہے۔اس موقع پر ن لیگی قائد نواز شریف نے ملکی معاملات کے بارے میں فکر مندی کا اظہار کیا۔