اسلام آباد (این این آئی) پاکستان تحریک انصاف نے کہاہے کہ حکومت کی جانب سے عدالت میں آئیں بائیں شائیں کی گئی ،یہ الیکشن سے فرار اختیار کرنا چاہتے ہیں ، آئین سے بالاتر پارلیمنٹ نہ ہی سپریم کورٹ ہے ،مذاکرات ہوتے ہیں تو ہم ویلکم کریں گے،آج پارلیمنٹ میں بیٹھنے کو ہم تیار ہیں ۔ان خیالات کا اظہار سابق وزراء شاہ محمود قریشی ، فواد چوہدری ، شیخ رشید احمد اور سینیٹر فیصل جاوید نے میڈیا سے گفتگو کرتے ہوئے کیا ۔

شاہ محمود قریشی نے کہاکہ فاضل سپریم کورٹ کو گزارشات پیش کی ہیں،ہم نے وضاحت دے دی ہے،سلمان اکرم راجہ کے چیمبر میں بیٹھ کر ہم نے لائحہ عمل تشکیل دیا تھا۔ انہوں نے کہاکہ تحریک انصاف کے چیئرمین نے تین رکنی کمیٹی تشکیل دے دی ہے۔ انہوں نے کہاکہ اٹارنی جنرل نے پی ٹی آئی کی کمیٹی کو قبول کیا ہے۔ سابق وزیر نے کہاکہ حکومت الیکشن سے فرار کی راہ اختیار کرنا چاہتے ہیں۔ انہوں نے کہاکہ آج پارلیمنٹ میں بیٹھنے کو ہم تیار ہیں ۔ شاہ محمو قریشی نے کہاکہ چار بجے کا وقت دیا گیا ہے ہم سنجیدہ ہیں چار بجے حاضر ہو جائیں گے۔ فواد چوہدری نے کہاکہ آئین سے بالاتر نہ پارلیمنٹ ہے نہ سپریم کورٹ ہے،نوے دن کے اندر الیکشن آئین کے تحت ہونے ہیں ،اسطرح نہیں ہوتا کہ ہم نے پیسے نہیں دینے یا پارلیمنٹ نے نہیں دینے۔فواد چوہدری نے کہاکہ سپریم کورٹ کے حکم پر مذاکرات شروع ہوتے ہیں تو ہم ویلکم کرتے ہیں ۔ انہوں نے کہاکہ شاہ محمود کی قیادت میں ہمارے لوگ مذاکرات کیلئے جائیں گے،75 فیصد علاقے میں الیکشن میں بغیر حکومت معاملہ نہیں چل سکتا۔

شیخ رشید احمد نے کہاکہ مذاکرات وقت ضائع کرنے کی حکومت ایک سازش کر رہی ہے۔ انہوں نے کہاکہ گزشتہ روز اسپیکر نے جو سپریم کورٹ کو خط لکھا وہ کھلی بدمعاشی ہے،یہ الیکشن میں نہیں جائیں گے یہ تاخیری حربے استعمال کر رہے ہیں۔سینیٹر فیصل جاوید خان نے کہاکہ چیف جسٹس صاحب نے بڑے تحمل اور صبر کا مظاہرہ کیا ہے،جتنا موقع ان کو ملتا ہے یہ معاملہ آگے لے کر جانا چاہتے ہیں۔

انہوں نے کہاکہ پی ٹی آئی مذاکرات کے حوالے سے سنجیدہ تھی پی ڈی ایم مذاکرات پر سنجیدہ نہیں ۔فیصل جاوید نے کہاکہ مذاکرات تب کامیاب ہو سکتے ہیں جب آئین کو تسلیم کیا جائے،یہ لوگ سیاستدان نہیں یہ مفادات کیلئے پارلیمنٹ استعمال کر رہے ہیں،مذاکرات اگلے دو چار گھنٹوں میں ہو گئے تو ہوگئے ورنہ میرا نہیں خیال ہونگے۔

موضوعات:،تحریک انصاف