کراچی ( نیوز ڈیسک) کراچی میں گزشتہ روز بورڈ آفس کے قریب ٹریفک پولیس اہلکار کو زخمی کرنے والے ملزم سے ابتدائی تفتیش مکمل کر لی گئی ہے۔ ذرائع کے مطابقو ملزم نے ٹریفک پولیس اہلکار پر تیس بور پستول سے فائرنگ کی، جائے وقوعہ سے تیس پستول بور کے دو خول اور ایک گولی بھی ملی ہے۔ ابتدائی طور پر ملزم نے اپنا نام بلال بتایا تھا لیکن اس سے برآمد ہونے والے کارڈ کے اس کی شناخت جنید کے نام سے ہوئی ہے۔ ملزم نے تفتیش کے دوران چند گھنٹوں میں اپنے تین نام تبدیل کئے۔ ملزم کے ساتھی کی گرفتاری کے لئے نیو کراچی کے ایک گھر میں چھاپہ بھی مارا گیا لیکن ملزم کا ساتھی گرفتار نہ ہو سکا۔ بورڈ آفس پر فائرنگ کے بعد زخمی ملزم اپنی بغیر نمبر پلیٹ کی موٹر سائیکل چھوڑ کر فرار ہوا۔ ملزم نے لفٹ لینے کی کوشش کی لیکن لفٹ نہ ملنے کے باعث بس میں سوار ہو کر ناگن چورنگی پہنچا اور وہاں موجود اس کا ساتھی لیاقت آباد کےراستے اسے گرومندر لے گیا۔ ملزمان کی جانب سے ایمبولینس سروس کو گرومندر پر ڈکیتی مزاحمت پر فائرنگ کا واقعہ بتایا گیا۔ ملزم ایمبولینس منگوا کر سول ہسپتال پہنچا اور سول ہسپتال سے پولیس کنٹرول کو اطلاع کی گئی۔ ملزم کو ٹریفک پولیس کے دو اہلکاروں اور عینی شاہدین نے شناخت کر لیا۔ ملزم کو نامعلوم مقام پر منتقل کر کے مزید تفتیش کی جا رہی ہے۔