حیدر آباد دکن(نیوز ڈیسک) صدرآئی سی سی ظہیر عباس پاک بھارت کرکٹ میں ’پل‘ کا کردار ادا کرنے کیلیے کوشاں ہیں، انھوں نے روایتی حریفوں کے درمیان سیریز کیلیے موجودہ وقت کو مناسب ترین قرار دے دیا۔تفصیلات کے مطابق انٹرنیشنل کرکٹ کونسل کے صدر ظہیر عباس ان دنوں دورئہ بھارت کے دوران حیدرآباد دکن میں موجود ہیں، انھیں وہاں مقامی اسٹیٹ کرکٹ ایسوسی ایشن نے مدعو کیا ہے۔ ظہیر عباس پاک بھارت سیریز کو یقینی بنانے کیلیے کوشاں ہیں،انھوں نے کہاکہ اس وقت پوری دنیا چاہتی ہے کہ دونوں ممالک آپس میں کھیلیں، مجھے امید ہے وہ وقت جلد ہی آئے گا جب ہم کرکٹ کھیلنا شروع کردیں گے، اس بات میں کوئی بھی شک نہیں کہ پوری دنیا روایتی حریفوں کے درمیان سیریز کی شیدائی ہے۔
اگر ہم کھیلنا چاہتے ہیں تو اس کے لیے یہی وقت مناسب ترین ہے، آئی سی سی کے چیف ایگزیکٹیو ڈیو رچرڈسن بھی کہہ چکے ہیں کہ ایشز کے بعد لوگ پاک بھارت مقابلے دیکھنا پسند کرتے ہیں۔
ظہیر عباس نے کہا کہ وہ دونوں ممالک کے درمیان کرکٹ تعلقات کی بحالی کیلیے کردار ادا کرنے کو تیار ہیں۔ جب ان سے پوچھا گیا کہ کیا وہ اس سلسلے میں بھارتی کرکٹ بورڈ سے بھی بات کریں گے تو انھوں نے کہاکہ اگر وہاں پر کوئی ایسا ہوا جس سے میں مل کراپنا پیغام پہنچا سکوں تو ضرورایساکروں گا۔
ظہیر عباس نے امید ظاہر کی کہ بی سی سی آئی جلد ہی دسمبر میں یو اے ای میں سیریز کھیلنے کیلیے پی سی بی سے بات چیت کا آغاز کرے گا،انھوں نے کہا کہ میں نے 1960، 1970 میں پاکستان کیلیے کرکٹ کھیلنا شروع کی تو مجھے بھارت سے کھیلنے کا موقع 18 برس بعد میسر آیا، اس لیے میں سمجھتا ہوں کہ دونوں ممالک میں ایک بار پھر کرکٹ تعلقات بحال ہونے چاہئیں۔