لاہور(اسپورٹس ڈیسک)پاکستان کر کٹ بورڈ (پی سی بی )نے سابق کرکٹرز پر مشتمل کرکٹ کمیٹی بنانے کا فیصلہ کر لیا۔چیئرمین احسان مانی کے مطابق مذکورہ کمیٹی ہی کھیل سے متعلق امور سنبھالے گی،البتہ ارکان کے نام ابھی ظاہر نہیں کیے جا سکتے،انھوں نے اپنے لیے مشیروں کے تقرر کو خارج از امکان قرار دیا،چیئرمین پی سی بی احسان مانی کا کہنا ہے کہ ہم نے سابق کرکٹرز پر مشتمل کرکٹ کمیٹی بنانے کا فیصلہ کر لیا ہے، اس حوالے سے مشاورت شروع ہوچکی ، میں کسی کا نام نہیں لوں گا۔مگر جس کے بارے میں بھی ایسا محسوس ہوا کہ

وہ ملکی کرکٹ کی بہتری کیلئے کچھ کر سکتا ہے اسے کمیٹی میں شامل کر لیں گے۔سابق کھلاڑی کھیل کی باریکیاں سمجھتے ہیں اور وہی اس حوالے سے معاملات سنبھالیں گے۔انھوں نے کہا کہ میرا اپنے لیے مشیر رکھنے کا کوئی ارادہ نہیں اور کرکٹ کمیٹی ہی کو ہی مکمل اختیارات حاصل ہوں گے۔احسان مانی نے کہا کہ میرا تقرر 36 ماہ کے لیے ہوا اور ابھی عہدہ سنبھالنے ایک مہینہ ہی گذرا ہے، ابھی میں معاملات سمجھنے کی کوشش کر رہا ہوں۔