اوول (مانیٹرنگ ڈیسک)پاکستان اوربھارت کے درمیان آئی سی سی چیمپئنز ٹرافی کافائنل میچ کل کھیلاجائے گا،اسی حوالے سے پاکستان کرکٹ ٹیم کے بائولنگ کوچ اظہر محمود نے کہا ہے کہ آئی سی سی چیمپئنز ٹرافی فائنل میں پاکستان کے پاس کھونے کو کچھ نہیں ہو گا البتہ روایتی حریف بھارت پر ٹائٹل دفاع کا دباؤ ہو گا اسلئے ٹیم کے پاس ٹائٹل جیتنے کا سنہری موقع ہے. میرا دل کہتا ہے کہ اس بار گرین شرٹس ٹائٹل جیت کر نئی تاریخ رقم کرے گی۔

پاکستان اور بھارت کی ٹیمیں چیمپئنز ٹرافی فائنل میں کل کھیلیں گی۔اپنے ایک بیان میں انہوں نے کہا کہ ٹورنامنٹ کے شروع سے کہہ رہا ہوں کہ پاکستانی ٹیم فائنل میں پہنچے گی، مجھے اپنے کھلاڑیوں پر یقین ہے، اگر ٹیم ٹائٹل جیتنے میں کامیاب ہوئی تو یہ قوم کیلئے بڑا تحفہ ہو گا۔ انہوں نے کہا کہ پاکستان اور بھارت کے درمیان مقابلوں میں ہمیشہ دونوں ٹیموں پر دباؤ رہا ہے، بھارت کسی خوش فہمی میں نہ رہے اس کیلئے ٹائٹل کا دفاع کرنا آسان نہیں ہو گا کیونکہ گرین شرٹس ٹائٹل فیورٹس جنوبی افریقہ اور انگلینڈ کو شکست دے کر فائنل میں پہنچی ہے۔ انہوں نے کہا کہ تاریخ بدلی جا سکتی ہے اور مجھے کھلاڑیوں پر پورا یقین ہے کہ وہ فائنل میں عمدہ پرفارم کر کے آئی سی سی ٹورنامنٹس میں بھارت کے خلاف ناکامیوں کی روایت توڑ دیں گے۔واضح  رہے کہ پاکستان نے ایونٹ میں انگلینڈ،جنوبی افریقہ اورسری لنکاجیسی مضبوط ٹیموں کوشکست دے کرپہلی مرتبہ اس ایونٹ کے فائنل تک پہنچاہے ۔جبکہ دوسری طرف بھارتی ٹیم اس وقت دبائوکاشکارہے کیونکہ اس نے اس ایونٹ کادفاع بھی کرناہے جبکہ اس کے کپتان ویرات کوہلی ابھی تک فٹ نہیں قرارپائے ہیں جبکہ پاکستان کے فاسٹ بائولرمحمدعامرفٹ ہوگئے ہیں ۔

موضوعات:اظہر محمود پاکستان