مریدکے،لاہور ( این این آئی، آن لائن)مریدکے میں تحریک انصاف کے لانگ مارچ میں عمران خان کے کنٹینر کے قریب انڈر پاس کی فائبر والی چھت گرگئی جس کے نتیجے میں 7 افراد زخمی ہوگئے۔نجی ٹی وی کے مطابق تحریک انصاف کا مارچ مریدکے پہنچنے پر

عمران خان نے اپنے کنٹینر پر خطاب کیا، اس دوران لوگ تنگ جگہ کی وجہ سے فلائی اوور پرموجود تھے۔عمران خان کے کنٹینر کے قریب ایک فلائی اوور کی فائبر والی چھت گرنے سے ایلیٹ فورس کے اہلکار سمیت سات افراد زخمی ہوگئے۔ریسکیو ذرائع کے مطابق زخمیوں میں ایلیٹ پولیس کا اہلکار بھی شامل ہے جبکہ پانچ افراد کی حالت تشویشناک ہے۔دوسری جانب پاکستان تحریک انصاف کے مرکزی رہنما و فوکل پرسن فوڈ سکیورٹی جمشید اقبال چیمہ نے کہا ہے کہ عمران خان کے لانگ مارچ نے ملک کے سیاسی مستقبل کا تعین کر دیا ہے ، عوام عام انتخابات کی حتمی تاریخ لینے کیلئے عمران خان کی قیادت میں اپنا سفر جاری رکھے ہوئے ہیں،تحریک انصاف وزیر انتشار کی گیدڑ بھبکھیوں سے ہرگز مرعوب نہیں ہو گی ۔ اپنے بیان میں جمشید اقبال چیمہ نے کہا کہ جب سے تحریک انصاف نے لانگ مارچ کا آغاز کیا ہے پی ڈی ایم ٹولہ دبک کر بیٹھ گیا ہے اور ان کی کانپیں ٹانگ رہی ہیں، امپورٹڈ ٹولہ کی یہ بھول ہے کہ وہ کمیٹیوں کے کھیل میں الجھا کر ہمیں اپنے اصل مقاصد سے ہٹا سکتے ہیں ۔ عوام پر عزم ہیں کہ وہ عام انتخابات کی تاریخ لئے بغیر واپس نہیں آئیں گے۔

موضوعات:لانگ مارچ