اسلام آبا د(این این آئی)وفاقی دارالحکومت اسلام آباد میں تھانہ بنی گالہ کی حدود کورنگ نالے کے پانی میں پھنسے 4 بچوں کو ریسکیو کرلیا گیا۔تفصیلات کے مطابق نیوی اور ریسکیو ٹیموں نے بچوں کو بحفاظت نکالنے کے بعد گھروں پر پہنچا دیا ہے۔ رپورٹ کے مطابق اسلام آباد میں موسلادھار بارش سے سیکٹر ایچ 13 میں نالے کی دیواریں ٹوٹ گئیں، پانی گھروں میں داخل ہو گیا۔

متعدد گاڑیاں بھی پانی میں پھنس گئیں۔دوسری جانب راولپنڈی میں موسلا دھار بارش کے باعث خطرے کی علامت سمجھے جانے والے نالہ لئی کی سطح 18 فٹ تک ریکارڈ کی گئی ہے، کسی بھی ہنگامی صورت حال سے نمٹنے کیلئے پاک فوج کے دستوں کو بھی طلب کیا گیا ہے۔راولپنڈی، اسلام آباد میں موسلادھار بارش سے نشیبی علاقوں میں پانی داخل ہوگیا، بارش کا پانی مری روڈ پرجمع ہوجانے کے سبب ٹریفک جام میں متعدد ایمبولینسز پھنس گئیں۔بارش کے باعث لیاقت باغ، کمیٹی چوک اور مریڈ چوک پر پانی جمع ہوجانے کے سبب گاڑیوں کی لمبی قطاریں لگ گئیں۔ڈھوک کالا خان میں ایمبولینس بارش کے پانی میں پھنس گئی، مقامی افراد نے اپنی مدد آپ کے تحت ایمبولنس کو پانی سے نکالا۔کمشنر راولپنڈی نے نالہ لئی میں طغیانی کے خدشہ کی وجہ سے متعلقہ اداروں کو ہائی الرٹ کر دیا ہے۔کمشنر راولپنڈی نے بتایاکہ پانی کی سطح کو مسلسل مانیٹر کیا جا رہا ہے اور واسا کی مشینری مسلسل حرکت میں ہے۔پی ڈی ایم اے کو کمشنر راولپنڈی نے ہدایت جاری کی کہ اپنا الرٹ سسٹم اپ ڈیٹ رکھیں اور لوگوں کو صورتحال سے بر و قت آگاہ رکھا جائے۔کمشنر راولپنڈی نے بتایا کہ نشیبی علاقوں سے پانی فوری طور پر نکال کر رپورٹ پیش کی جائے۔واضح رہے کہ راولپنڈی میں موسلادھار بارش سے گرمی کا زور ٹوٹ گیا اور موسم خوشگوار ہوگیا۔ضلعی انتظامیہ کے مطابق شمس آباد میں11،چکلالہ میں 36 ملی میٹر بارش ریکارڈ کی گئی جبکہ نالہ لئی میں کٹاریاں پر پانی کی سطح 4 فٹ اور گوالمنڈی پر 5 فٹ ہے۔

موضوعات:بارش