اسلام آباد (آئی این پی)سابق وفاقی وزیر و رہنما تحریک انصاف شبلی فراز نے کہا ہے کہ مسجد نبویؐ میں نعرے لگانے والے پی ٹی آئی کے کارکن نہیں بلکہ پاکستانی تھے‘مسجد نبویؐ میں جو کچھ ہوا وہ غلط تھا ‘قاسم سوری پر جو حملہ بھی انتہائی غلط تھا‘عمران خان نے اسلامو فوبیا

اور حرمت رسول ؐ کیلئے کام کئے‘ ہم امربالمعروف پر عمل کرتے ہیں اور کرتے رہیں گے ‘سازش عمران خان کے نہیں پاکستان کیخلاف ہوئی ہے ‘عید کے بعد عمران خان نے اسلام آباد پہنچنے کی کال دی ہے ‘20 لاکھ لوگوں کو اکھٹا کریں گے۔نجی ٹی وی کے پروگرام میں گفتگو کرتے ہوئے شبلی فراز نے کہا کہ مسجد نبویؐ میں جو واقعہ ہوا وہ غلط تھا جب کہ رات کوقاسم سوری پر جو حملہ کیا گیا وہ بھی انتہائی غلط تھا۔ شبلی فراز نے کہا کہ عمران خان نے اسلامو فوبیا اور حرمت رسول ؐ کیلئے کام کیے ہم امربالمعروف پر عمل کرتے ہیں اور کرتے رہیں گے ان کی حکومت آئے کچھ دن ہوئے اور ارشد شریف کو ہراساں کیاجانے لگا (ن) لیگ کے تو وزیرخزانہ امریکا میں کیا کچھ نہیں کہہ کر آئے ہیں۔انہوں نے کہا کہ سازش عمران خان کے نہیں پاکستان کیخلاف ہوئی ہے مراسلہ میں نے خود دیکھا ہے جس میں دھمکی دی گئی مراسلے میں تھا تحریک عدم اعتماد کامیاب ہو گئی تو معاف کر دیا جائے گا۔ان کا کہنا تھا کہ عید کے بعد عمران خان نے اسلام آباد پہنچنے کی کال دی ہے اسلام آباد میں 20 لاکھ لوگوں کو اکھٹا کریں گے عمران خان کیخلاف کچھ نہیں ملا اب کردارکشی کی جارہی ہے۔

موضوعات:شبلی فراز