لاہور(این این آئی) پاکستان پیپلز پارٹی کے چیئرمین بلاول بھٹو زرداری اور پنجاب اسمبلی میں قائد حزب اختلاف حمزہ شہباز کے درمیان اتوار کے روز ملاقات ہے۔ذرائع کے مطابق ملاقات میں ملک کی مجموعی سیاسی صورتحال، چیئرمین،ڈپٹی چیئرمین سینیٹ کے انتخاب، پنجاب میں ان ہاؤس تبدیلی سمیت

پی ڈی ایم کی آئندہ کی سر گرمیوں کے حوالے سے تبادلہ خیال اور حکمت عملی بارے تبادلہ خیال کیا جائے گا۔ذرائع کے مطابق حمزہ شہباز شریف کی جانب سے بلاول بھٹو اور ان کے وفد کو ظہرانہ بھی دیا جائے گا۔ دوسری جانب پاکستان مسلم لیگ (ن) کے صدر شہباز شریف سے ان کے صاحبزاد ے پنجاب اسمبلی میں قائد حزب اختلاف حمزہ شہباز اور دیگر اہل خانہ نے کوٹ لکھپت جیل میں ملاقات کی۔ حمزہ شہباز اور اہل خانہ نے شہباز شریف سے ان کی کمر کی تکلیف کے بارے میں آگاہی حاصل کی۔ذرائع کے مطابق شہباز شریف اور حمزہ شہباز نے موجودہ سیاسی صورتحال اور پی ڈی ایم کی آئندہ کی حکمت عملی کے حوالے سے تبادلہ خیال کیا۔ ذرائع کے مطابق حمزہ شہباز نے شہباز شریف کو پیپلز پارٹی کے چیئرمین بلاول بھٹو سے ملاقات کے حوالے سے بھی آگاہ کیا اور ان سے چیئرمین اور ڈپٹی چیئرمین سینیٹ کے انتخاب کے حوالے سے تبادلہ خیال کیا۔ ذرائع کے مطابق حمزہ شہباز نے بطور پارٹی صدر شہباز شریف سے آئندہ کے حوالے سے رہنمائی بھی حاصل کی۔بتایا گیا ہے کہ اہل خانہ نے دوپہر کا کھانا شہباز شریف کے ہمراہ کھایا۔

موضوعات:سرپرائز دینے کی تیاریاں