لاہور( این این آئی)وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ ملتان کی جلسی کے بعد جاتی عمرہ کی راج کماری اور کنیزوں کی نیندیں حرام ہو چکی ہیں۔ راج کماری اور کنیزیں خود فریبی اور خوف کا شکار ہیں اور لاڈلا شہزادہ

بھی اب چین کی بانسری بجا رہا ہے۔ سیاسی تماشا لگانے والے بہت جلد خود تماشا بننے والے ہیں۔ایک بیان میں انہوں نے کہا کہ بین الاقوامی منی لانڈر اسحاق ڈار کا بی بی سی کو دیا گیا انٹرویو جھوٹ اور سچ کی خود گواہی دے رہا ہے۔ اسحاق ڈار کے منہ سے ڈر کے مارے سچ نکلا اور ایک بار پھر ’’شریف سیاست‘‘ کا پردہ چاک ہوا۔ 30 سال تک پاکستان کو بے دردی سے لوٹنے والے کسی صورت راہنما نہیں بلکہ راہزن ہیں۔ 22 کروڑ عوام راج کماری اور شہزادے کے خاندانوں کی لوٹ مار کبھی نہیں بھول سکتے۔ ڈاکٹر فردوس عاشق اعوان نے کورونا کی صورتحال کے حوالے سے کہا کہ اپوزیشن کورونا پھیلانے سے باز رہے۔ صورتحال روز بروز خراب ہو رہی ہے اور متاثرہ مریضوں کی تعداد بڑھ رہی ہے۔ گزشتہ 24گھنٹے کے دوران کورونا کے727کنفرم کیسز سامنے آئے اور25مریض جاں بحق ہوئے۔ پنجاب میں کورونا کے ایکٹو مریضوں کی تعداد19,000 ہوچکی ہے اور کورونا سے3,091 مریض جاں بحق ہوچکے ہیں۔ ان حالات میں عوامی اجتماع کا انعقاد عوام سے کھلی دشمنی ہے۔ انہوں نے کہا کہ اپوزیشن کو عوام کی نہیں بلکہ لوٹی ہوئی دولت بچانے کی فکر ہے۔ پی ڈی ایم کے پورے ٹولے کا اپر چیمبر خالی ہے۔ پی ڈی ایم کے عاقبت نااندیش عناصر ہوش کے ناخن لیں اور عوام کی زندگیوں سے نہ کھیلیں۔

موضوعات:فردوس عاشق اعوان