سمبڑیال( آن لائن ) وزیراعظم پاکستان کی معاون خصوصی برائے اطلاعات ونشریات ڈاکٹر فردوس عاشق اعوان نے کہاہے کہ ملک کے سیاسی موسم میں کوئی تبدیلی نہیں آرہی وزیراعظم عمران خان کے سرپر اقتدار کا ہُما پانچ سال کے لیے بیٹھا ہے یہ اپوزیشن کے رونے دھونے سے اڑنے والا نہیں ، لہذا حکومت کے بدخواہو ں کے ہاتھ کچھ نہیں آئے گا ملکی ترقی وخوشحالی اوراستحکام کے لیے ملک کےتما م ادارے ایک پیج پر ہیں حکومتی ٹیم بھی کامیابی سے بغیر کرپشن کے میرٹ پر کام کررہی ہے عمران خان اپنے پختہ عزم اوردلیرانہ فیصلوں سے ملک کو
مشکل ترین صورتحال سے نکال کر درست سمت میں لے آئے ہیں آنے والا وقت خوشیوں کا ہے، آنے والا وقت پاکستانی عوام کیلئے خوشحالی لائے گااور ہر پاکستانی خوشحال زندگی بسر کر رہا ہو گا ۔ ان خیالات کااظہارانہوںنے مرکزی رہنما پی ٹی آئی ،وائس چیئرمین اینٹی کرپشن کمیٹی پنجاب بریگیڈئر(ر) اسلم گھمن کی قیادت میں ملنے والے وفد سے گفتگو کرتے ہوئے کیا ان کا کہنا تھا کہ شریف فیملی سیاست سے مائنس ہوچکی ہے (ن) لیگ اورپی پی کو اقتدار سے باہر ایک ایک دن صدیوں کے برابر لگ رہا ہے اپوزیشن جماعتیں حکومت مخالف سازشوں کی بجائے احتساب کے عمل کا سامنا کریں یہ انتقام نہیں احتساب ہورہا ہے اورملک کا ایک آزاد ادارہ اپنے فرائض کو غیر جانبددارانہ انداز میں ادا کررہا ہے معاون خصوصی نے مزید کہا کہ ملک مشکل صورتحال سے تیزی سے نکل رہا ہے عنقریب پاکستا عمران خان کی قیادت میں قوم کے خوابوں کی تعبیر بنے گا بس تھوڑا صبر کرنا ہے گھبرانا نہیں مہنگائی بھی کم ہوگی نوکریاں بھی ملیں گی گھر بھی دیں گے بھر پور ریلیف ملے گا تعلیم ،صحت کی سہولیات کی فراہمی بھی ہماری حکومت کا اولین ایجنڈا ہے جبکہ ملک عزیز وزیراعظم عمران خان کی ولولہ انگیز قیادت میں اپنی اصلی منزل کی طرف رواں دواں ہے یعنی نیا پاکستان فلاحی مملکت۔