لاہور(این این آئی) پاکستان انٹر نیشنل ائیر لائنز کے حصص یافتگان کا دوسرا سالانہ عمومی اجلاس صدر و سی ای او پی آئی اے ائیر مارشل ارشد ملک کی صدارت میں منعقد ہوا۔اجلاس میں سال 2017 کے مالی حسابات اور سال 2018 کے مالی حسابات کے لئے بیرونی آڈیٹرز کے تقرر کی منظوری دی گئی۔سال 2017 کے اختتام پر پی آئی اے کی مجموعی آمدنی تقریباً91 ارب جبکہ خسارہ ساڑھے 46 ارب روپے رہا۔اجلاس میں بتایا گیا کہ 2017 میں ایندھن کی قیمتوں میں 14 فیصد اور مالی اخراجات میں 16 فیصد اضافہ رہا۔ائیر مارشل ارشد ملک نے کہا کہ قومی ائیر لائن کے حالات

اب بہتری کی جانب گامزن ہیں تاہم اسکو منافع بخش ہونے میں کچھ وقت ضرور لگے گا۔انہوں نے کہا کہ فضائی بیڑے میں طیاروں کی صورت حال کافی بہتر جا رہی ہے۔مالی حسابات میں تاخیر گزشتہ ادوار کی انتظامی کوتاہی رہی ہے۔ائیر مارشل ارشد ملک نے کہا کہ حصص یافتگان کی شکایات کا ازالہ کیا جائے گا اور انکی تجاویز پر سنجیدگی سے غور کیا جائے گا۔ہمارا رواں حج آپریشن کامیابی سے جاری ہے۔حصص یافتگان نے اجلاس کے ایجنڈے اور سفارشات کی منظوری دی۔ اجلاس میں سی ایف او خلیل اللہ شیخ اور سیکرٹری بورڈ آف ڈرایکٹرز محمد شعیب بھی موجود تھے۔

موضوعات:پی آئی اے کی مجموعی آمدنی