لاہور(این این آئی)مسلم لیگ (ن) کے صدر محمد شہباز شریف نے برطانیہ میں سیاسی پناہ کی خبروں کو بے بنیاد قرار دیتے ہوئے کہا ہے کہ اپنی پوتی سے ملنے اور اپنے ٹیسٹ کرانے لندن آیا ہوں۔شہباز شریف نے برطانیہ میں سیاسی پناہ کے حوالے سے وضاحت کرتے ہوئے

کہا کہ ایسی خبریں بے بنیاد ہیں، بجٹ سے پہلے پاکستان آجاؤں گا۔ علاوہ ازیں پاکستان مسلم لیگ(ن)کی مرکزی سیکرٹری اطلاعات مریم اورنگزیب نے نجی ٹی وی چینل کی خبر پر چیئرمین پیمرا کو خط لکھ دیا۔ خط میں کہا گیا ہے کہ خبر مکمل طور پر بے بنیاد، من گھڑت اور شرانگیزی پر مبنی ہے، بے بنیاد خبر سے پاکستان کی نمایاں اور مقبول ترین عوامی سیاسی جماعت، اس کے صدر اور قائد حزب اختلاف کی ساکھ، وقار اور نیک نامی کو شدید دھچکا پہنچایا گیا، اس من گھڑت خبر سے شہباز شریف کو ناحق ذہنی اذیت اور پریشانی میں مبتلا کیا گیا،اس شر انگیز خبر سے پارٹی کارکنان کے جذبات کو بھی گہری ٹھیس پہنچی ہے، یہ خبر عدالتوں میں پہلے سے زیر سماعت مقدمات پر اثرانداز ہونے کی مذموم اور قابل مذمت کوشش ہے،اس بے بنیاد، من گھڑت اور شرانگیزی پر مبنی خبر کا نوٹس لے کر پیمرا اور متعلقہ قاعدے و قانون کے تحت نجی ٹی وی کے ذمہ داران کے خلاف سخت کاروائی عمل میں لائے اور انصاف کے تقاضے پورے کئے جائیں۔متعلقہ چینل کو مستقبل میں ایسے غیر ذمہ دارانہ رویہ سے بھی روکا جائے۔