اسلام آباد (مانیٹرنگ ڈیسک) الیکشن کمیشن نے تحریک انصاف کے چیئر میں عمران خان اور جہانگیر ترین کی نااہلی سے متعلق پٹیشنز اور ریفرنس یکجا کرنے کی درخواست مسترد کردی ہے۔تفصیلات کے مطابق چیف الیکشن کمشنر سردار رضا خان کی سربراہی میں چار رکنی کمیشن نے عمران خان اور جہانگیر خان کی نااہلی سے متعلق مقدمے کی سماعت کی تو ن لیگ کے وکیل اکرم شیخ نے دلائل دیتے ہوئے کہا کہ عمران خان نے آف شورکمپنی’’نیازی سروسز‘‘کوگوشواروں میں ظاہرنہیں کیا اور نہ ہی عمران خان نے گزشتہ 2 سال کے گوشواروں میں آف شورکمپنی کا ذکرکیا۔اکرم شیخ نے نااہلی ریفرنس کو دیگر مقدمات کے ساتھ منسلک کرنے کی درخواست کی جسے چیف الیکشن کمشنر نے مسترد کرتے ہوئے کہا کہ ریفرنس اورپیٹشنزکی نوعیت میں فرق ہیاس لیے ریفرنس اور پٹیشن کو یکجا نہیں کرسکتے۔چیف الیکشن کمشنر نے کہا کہ آج آپ کیسزکو یکجا کرنے کا نیا شوشہ چھوڑ رہے ہیں لگتا ہے آپ سب سیاست کررہے ہیں اور قانونی نکات سے کسی کو دلچسپی نہیں۔جہانگیر ترین کے وکیل سکندر بشیر نے سپریم کورٹ کے فیصلے تک کیس موخرکرنے کی استدعا کردی۔انہوں نے کہا کہ نیازی سروسزکا معاملہ اضافی طور پراٹھایا جا رہا ہے کمیشن کے سامنے صرف بنی گالہ اراضی کامعاملہ ہے اس لیے کمیشن کا اختیارصرف ریفرنس میں لگائے گئے الزامات تک ہے۔طلال چودھری کے وکیل اکرم شیخ نے اضافی دستاویزات جمع کرانے کی مہلت مانگ لی جسے کمیشن نے منظور کرتے ہوئے کیس کی سماعت 10جنوری تک ملتوی کردی۔