راولپنڈی(این این آئی)کسٹم حکام نے سعودی عرب جانے والے کو ’’موت‘‘ سے بچالیا، بے نظیر انٹرنیشنل ایئرپورٹ سے بیرون ملک جانے والے مسافرسے کروڑوں روپے مالیت کی سوا کلو ہیروئن برآمد کر لی گئی۔اطلاعات کے مطابق ائیرپورٹ سیکیورٹی فورس (اے ایس ایف ) نے بے نظیر انٹرنیشنل ائیرپورٹ پر کارروائی کر کے نجی ایئر لائن کی پرواز کے ذریعے دمام جانے والے مسافر محمد مقبول سے سوا کلو ہیروئن برآمد کر لی ٗ گرفتار ملزم کا تعلق سرگودھا سے ہے۔اے ایس ایف حکام کا کہنا ہے کہ ملزم نے ہیروئن ہینڈ بیگ میں چھپا رکھی تھی جس کی مالیت عالمی منڈی میں کروڑوں روپے بنتی ہے، ملزم کو ابتدائی پوچھ گچھ کے بعد اینٹی نارکوٹکس فورس (اے این ایف) کے حوالے کردیا گیا ہے۔

موضوعات:کسٹم حکام