لاہور (نیوزڈیسک)پنجاب پولیس کے نئے یونیفارم کیلئے رنگ کا انتخاب ہوگیا،دو میں سے ایک رنگ حتمی ہوگا۔ پنجاب پولیس کے نئے یونیفارم کے لئے زیتونی سبز رنگ کو منتخب کیے جانے کا امکان ہے ۔بتایا گیا ہے کہ سینٹرل پولیس آفس میں ہونے والے اجلاس میں اعلیٰ پولیس افسران نے پولیس یونیفارم کےلئے بہت سے رنگوں میں سے دو رنگوں کو شارٹ لسٹ کیا تھا جن میں زیتونی سبز اور نیوی بلیو رنگ شامل تھے ۔ ذرائع کے مطابق زیادہ تر افسران نے موسم ،ماحول دوست اور زیادہ جاذب نظر ہونے کی وجہ سے زیتونی سبز رنگ کے حق میں رائے دی ہے۔اس حوالے سے نجی ٹی وی سے گفتگو کرتے ہوئے ایک اعلیٰ پولیس افسر کا کہنا تھا کہ میٹنگ کے شرکاءکا متفقہ فیصلہ تھا کہ پنجاب پولیس کو اب دہائیوں پرانے کالے یونیفارم سے چھٹکارا حاصل کرلینا چاہیے ۔پولیس حکام نے واضح کیا کہ نئے یونیفارم کو متعلقہ ڈیلرز کے ساتھ رجسٹرڈ ہونا چاہئے تاکہ پولیس یونیفارم کے اختیارات اور حرمت کے تقدس کو بڑھایا جا سکے۔ ان کا کہنا تھاکہ پرانے یونیفارم کا پہلے ہی دن سے رجسٹرڈ نہ ہونے کہ وجہ سے غلط استعمال ہو رہا ہے ۔