اسلام آباد(مانیٹرنگ ڈیسک)قصیم یونیورسٹی میں جغرافیائی علوم کے پروفیسر عبدللہ المسند نے کہا ہے کہ رواں برس رمضان کا پہلا روزہ 13اپریل 2021منگل کو ہوگا- شعبان کا مہینہ 30دن کا ہوگا اور اس کی آخری تاریخ پیر 12اپریل ہوگی، 12مئی 2021 کو رمضان کا آخری روزہ ہوگا

جبکہ عید جمعرات 13 مئی 2021 کو منائی جائے گی۔دوسری جانب مذہبی امور کے وفاقی وزیر نور الحق قادری نے ایک مرتبہ پھر ملک بھر میں ایک ہی روز رمضان اور عید ہونے کے عہد کا اعادہ کیا۔ میڈیا رپورٹس کے مطابق وفاقی وزیر برائے مذہبی امور پیر نورالحق قادری نے کہا کہ اب وہ بات نہیں ہوگی کہ ” پٹھان جانے اور رمضان جانے”۔ انہوں نے یہ بات ایک تقریب سے خطاب کرتے ہوئے کہی۔اس موقع پر تقریب میں مرکزی رویت ہلال کمیٹی کے چیئرمین مولانا سید عبدالخبیر آزاد، غلام احمد بلور، ڈاکٹر قبلہ ایاز، ملک طارق اعوان بھی موجود تھے۔ تقریب میں مولانا سید عبدالخبیر آزاد نے کہا کہ مفتی شہاب الدین سے رابطہ ہوا ہے ایک دو ملاقاتوں میں مسئلہ حل ہوجائے گا۔اس سے پہلے بھی مرکزی رویت ہلال کمیٹی پاکستان کے چیئرمین اور بادشاہی مسجد لاہور کے خطیب وامام مولانا سید محمد عبد الخبیر آزاد نے اپنے بیان میں کہا تھا کہ ہو سکتا ہے کہ رمضان کے حوالے سے آنے والا اجلاس پشاور میں منعقد کیا جائے۔

انہوں نے کہا کہ چاند کے معاملے پر قومی وحدت کو یقینی بنانے کی ضرورت ہے۔ اس سلسلے میں سندھ، پنجاب کے بعد بلوچستان کا بھی دورہ کروں گا۔ رمضان و عید کے معاملے پر شرعی شہادتوں کی روشنی میں فیصلے ہوتے ہیں، آئندہ محکمہ موسمیات اور جدید ٹیکنالوجی سے بھی استفادہ حاصل کریں گے ۔