راولپنڈی (این این آئی)پاک فوج کے ترجما ن میجر جنرل آصف غفور نے کہاہے کہ بھارتی طیارے گرانے کا 27 فروری کا واقعہ تاریخ کا حصہ بن چکا ہے،لائن آف کنٹرول کے پار کارروائی پاکستان فضائی حدود کے اندر سے جے ایف 17 تھنڈر طیاروں نے کی۔ پیر کو آئی ایس پی آرکے مطابق 27 فروری کا واقعہ تاریخ کا حصہ بن چکا ہے،لائن آف کنٹرول کے پار کارروائی پاکستان فضائی حدود کے اندر سے جے ایف 17 تھنڈر طیاروں نے کی،بعد میں جب دو بھارتی جہازوں نے لائن آف کنٹرول کی خلاف ورزی کی تو انہیں پاک فضائیہ نے نشانہ بنایا۔انہوں نے کہاکہ ان دو بھارتی جہازوں

کو ایف سولہ نے نشانہ بنایا یا جے ایف 17 نے یہ سوال بے معنی ہے۔انہوں نے کہاکہ پاک فضائیہ نے دونوں بھارتی جہازوں کو اپنے دفاع میں مار گرایا ۔انہوں نے کہاکہ جب بھارتی جہاز آئے تو فضائیہ کے تمام جہاز بشمول ایف 16 فضا میں موجود تھے۔انہوں نے کہاکہ بھارت اپنی خواہش کے مطابق حتی کہ ایف 16 چن لے اس سے کوئی جہاز چن لے نتیجے پر فرق نہیں پڑتا۔انہوں نے کہاکہ اگر ایف 16 استعمال ہوا تب بھی دو انڈین جہاز ہی نشانہ بنے۔انہوں نے کہاکہ پاکستان اپنے دفاع کے لیے اپنی ہر صلاحیت کا مرضی کے مطابق استعمال کرنے کا حق رکھتا ہے۔