اسلام آباد(مانیٹرنگ ڈیسک) متحدہ اپوزیشن کا احتجاج، مال روڈ لاہور پر موجود کاروباری، تعلیمی مراکز بند کر دئیے گئے، رینجرز طلب۔ تفصیلات کے مطابق مال روڈ لاہور پر عوامی تحریک کے سربراہ طاہر القادری کی قیادت میں متحدہ اپوزیشن کی جانب سے حکومت کے

خلاف احتجاج کی وجہ سے کاروباری مراکز اور تعلیمی ادارے بند کر دئیے گئے ہیں جب کہ لاہور کی انتظامیہ نے رینجرز کو طلب کر لیا ہے۔ ڈی آئی جی آپریشنز ڈاکٹر حیدراشرف نے کہا کہ پولیس کے پاس نہ اسلحہ ہوگا اور نہ ہی ڈنڈا، مال روڈ کو جانے والے راستوں پر اسنیپ چیکنگ شروع کردی گئی ہے، جب کہ سیاسی جماعتوں کے رضاکار بھی جلسہ گاہ میں آنے والوں کی چیکنگ کررہے ہیں۔ حکومت نے امن وامان کی صورتحال کوکنٹرول کرنے اور سرکاری عمارتوں کی حفاظت کے لیے رینجرز کی تین کمپنیوں کو طلب کی ہیں۔ رینجرز کو طلب کرنے کا فیصلہ رانا ثنا اللہ کی زیر صدارت احتجاج کے سلسلے میں ہونے والے انتظامات کے جائزہ کیلئے منعقدہ اجلاس میں کیا گیا۔ واضح رہے کہ عوامی تحریک اور اس کی ہمنوا جماعتوں کی جانب سے سانحہ ماڈل ٹائون پر اے پی سی میں وزیراعلیٰ پنجاب شہباز شریف اور صوبائی وزیر قانون رانا ثنا اللہ سے 7جنوری تک مستعفی ہونے کا مطالبہ کیا گیا تھا جس کے بعد مطالبہ پورا نہ ہونے پر عوامی تحریک کی سربراہی میں اپوزیشن جماعتوں نے پنجاب حکومت خاتمے کی تحریک شروع کرنے کا اعلان کر دیا تھا اور اس سلسلے میں احتجاج کیلئے 17جنوری کی کال دی تھی۔