ٹنڈو جام(مانیٹرنگ ڈیسک) صوبہ سندھ کے ضلع حیدرآباد کے علاقے ٹنڈوجام میں واقع سندھ زرعی یونیورسٹی کے باہر سائیکل میں نصب ریموٹ کنٹرول بم دھماکے کے نتیجے میں ایک رینجرز اہلکار زخمی ہوگیا۔ابتدائی معلومات کے مطابق یاسر نامی رینجرز اہلکار معمولی زخمی ہوئے جنھیں کمبائنڈ ملٹری ہسپتال (سی ایم ایچ) حیدرآباد منتقل کردیا گیا۔
ریموٹ کنٹرول بم ایک سائیکل میں نصب تھا جو مرکزی حیدرآباد۔میرپورخاص روڈ پر رینجرز کی گاڑی کے نزدیک دھماکے سے پھٹ گیا۔رینجرز اہلکار زرعی یونیورسٹی کے باہر تعینات تھے اور سیکیورٹی وجوہات کی بناء پر وہاں پیٹرولنگ کر رہے تھے۔
رپورٹس کے مطابق دھند کی وجہ سے رینجرز اہلکار سائیکل پر توجہ نہیں دے سکے۔واقعے کے بعد قانون نافذ کرنے والے اہلکاروں نے ایک مشتبہ شخص کو جائے وقوع سے گرفتار کرلیا جبکہ اس حوالے سے بھی رپورٹس سامنے آئی ہیں کہ جائے وقوع سے ایک اور ریموٹ کنٹرول بھی برآمد کیا گیا۔