سکھر(این این آئی)آرمی چیف مدت ملازمت میں توسیع کے حق میں نہیں ہیں۔قومی اسمبلی میں اپوزیشن لیڈر خورشید شاہ نے کہاہے کہ مجھے خوف ہے کہیں تشدد سے ریاست کو نقصان نہ اٹھانا پڑے ٗصورتحال خراب ہوئی تو پاکستان کے دشمنوں کو فائدہ ہوگا ٗ لال حویلی شیخ رشید کی پراپرٹی ہے ٗ کوئی بھی کسی کی ذاتی ملکیت خالی نہیں کراسکتا۔

میڈیا سے گفتگو میں قومی اسمبلی میں اپوزیشن لیڈر خورشید شاہ نے کہاکہ حکومت سے پہلے ہی کہا تھا کہ احتیاط کی ضرورت ہے اور حکومتی رہنماؤں سے ملاقت میں کہا بھی تھا کہ کہیں یہ معاملہ تشدد میں تبدیل نہ ہوجائے کیونکہ صورتحال خراب ہوئی تو اس کا فائدہ پاکستان دشمنوں کو ہوگا،خوف آتا ہے کہ کہیں تشدد سے ریاست کو نقصان نہ اٹھانا پڑے اور ہمیں دوبارہ زیرو سے شروع ہوناپڑے۔ انہوں نے کہاکہ نظر آرہا تھا کہ اس طرح کا ماحول ضرور پیدا ہوگا تاہم بچوں اور خواتین پر تشدد نہیں ہونا چاہیے، عوام کی جان اور مال کی حفاظت کی ذمہ داری حکومت پر عائد ہوتی ہے۔خورشید شاہ نے کہا کہ ہر سیاست دان کو حقیقت پسند ہونا چاہیے ٗ لال حویلی شیخ رشید کی پراپرٹی ہے اور کوئی بھی کسی کی ذاتی ملکیت خالی نہیں کراسکتا۔انہوں نے کہاکہ حکومت مذاکرات کر لے تو عمران خان کا احتجاج ختم ہو سکتا ہے اور اگر حکومت ہمارے مطالبات مان لے تو سارے جھگڑے ختم ہو سکتے ہیں۔ ایک سوال کے جواب میں انہوں نے کہا کہ آرمی چیف مدت ملازمت میں توسیع کے حق میں نہیں ہیں۔

موضوعات:پیپلزپارٹی جنرل راحیل شریف