واشنگٹن (ای این آئی)امریکی محکمہ محنت نے بتایا ہے کہ امریکہ میں بے روزگاری الاؤنس کے لیے درخواست دینے والوں میں ریکارڈ اضافہ ہوا ہے۔ پچھلے ہفتے 66 لاکھ 50 ہزار سے زیادہ افراد نے اپنی درخواستیں جمع کرائیں جن میں کہا گیا تھا کہ ان کی ملازمت ختم ہو گئی ہے، اس لیے انہیں بے روزگاری الاؤنس دیا جائے۔میڈیارپورٹس کے مطابق اس سلسلے میں تازہ اعداد و شمار میں بتایا گیا ہے کہ
گزشتہ تین ہفتوں کے دوران ایک کروڑ سے زیادہ کارکنوں کی ملازمتیں ختم ہو گئی ہیں، جس کی وجہ کرونا وائرس کے پھیلاؤ کے ڈر سے کاروباروں، صنعتوں اور سروسز سے وابستہ اداروں کی بندش ہے۔ یہ خدشات موجود ہیں کہ آنے والے ہفتوں میں لاک ڈاؤن کے باعث مزید لاکھوں افراد بے روزگاروں کی فہرست میں شامل ہو سکتے ہیں جس سے بے روزگاری الاؤنس طلب کرنے والوں میں مزید اضافہ ہو گا۔بے روزگاری الاؤنس کے لیے سب سے زیادہ درخواستیں امریکہ کی سب سے گنجان آباد ریاست کیلی فورنیا سے دائر کی گئیں جن کی تعداد 8 لاکھ 80 ہزار ہے۔ اس کے بعد مشرقی ریاست پنسلوانیا کا نمبر آتا ہے جہاں سے چار لاکھ سے زیادہ درخواستیں موصول ہوئیں۔ اس فہرست میں نیویارک 3 لاکھ 66 ہزار کے ساتھ تیسرے نمبر پر ہے۔
