اسلام آباد (این این آئی)رہنماء پی ٹی آئی شیر افضل مروت نے متنازع بیان دینے پر کور کمیٹی سے معذرف کرلی۔ تفصیلات کے مطابق چیئرمین پی ٹی آئی بیرسٹر گوہر کی زیر صدارت تحریک انصاف کی کور کمیٹی کا اجلاس ہوا جس میں کمیٹی ممبران نے شیر افضل مروت اور بیرسٹر علی ظفر کی جانب سے دیئے گئے متنازع بیان کی شدید مذمت کرتے ہوئے کہا کہ ایسے بیانات سے پارٹی کو شدید نقصان کا سامنا کرنا پڑے گا۔ذرائع کے مطابق شیر افضل مروت نے کور کمیٹی کے ممبران کو آئندہ کوئی بھی متنازع بیان نہ دینے کی یقین دہانی کروائی اور حالیہ متنازع بیان پر ممبران سے معذرت کی۔

بعدازاں شیر افضل مروت نے میڈیا سے بات کرتے ہوئے کہا کہ کور کمیٹی نے فیصلہ کیا ہے کہ مرکز اور صوبوں میں بھرپور احتجاجی تحریک چلائیں گے جبکہ پہلا جلسہ اسلام آباد میں 30مارچ کو ہوگا۔شیرافضل مروت نے کہا کہ آئندہ جو بھی فیصلے ہوں گے وہ کور کمیٹی کے ذریعے ہی ہوں گے، پنجاب، سندھ ، خیبر پختونخوا کے اراکین بھی آئندہ بانی چیئرمین پی ٹی آئی کے کیسز کی سماعت کے دوران عدالتوں میں پہنچیں گے۔اجلاس کے دوران پی ٹی آئی کور کمیٹی کو بانی پی ٹی آئی عمران خان کے مقدمات پرمکمل بریفنگ دی گئی۔