اسلام آباد (نیوز ڈیسک) پاکستان میں موجود ایشیا کپ کی مینز اور ویمنز ٹرافیوں کے بھارت منتقل ہونے کے امکانات فی الحال پیدا نہیں ہوسکے،
دونوں ٹرافیاں ایشین کرکٹ کونسل (اے سی سی) کے صدر محسن نقوی کے پاس موجود ہیں۔ذرائع کے مطابق گزشتہ سال دبئی میں بھارتی مینز کرکٹ ٹیم نے ایشین کرکٹ کونسل کے صدر محسن نقوی سے ایشیا کپ کی ٹرافی وصول نہیں کی تھی، جبکہ گزشتہ اتوار بھارتی ویمنز ٹیم نے بھی کامیابی حاصل کرنے کے باوجود ٹرافی لینے سے گریز کیا۔ذرائع کا کہنا ہے کہ مینز اور ویمنز ایشیا کپ کی دونوں ٹرافیاں اس وقت پاکستان میں موجود ہیں اور انہیں فی الحال کہیں منتقل نہیں کیا جارہا۔
ذرائع کے مطابق بھارتی کرکٹ بورڈ کو ٹرافیاں وصول کرنے کے لیے پہلے اپنی رضامندی ظاہر کرنا ہوگی۔ اس کے بعد دونوں ٹرافیاں اے سی سی کے صدر محسن نقوی ہی بھارتی حکام کے حوالے کریں گے۔دوسری جانب بھارتی کرکٹ بورڈ کے سیکریٹری دیواجیت سائیکیا نے اپنے ایک بیان میں کہا تھا کہ ایشیا کپ کی دونوں ٹرافیاں بالآخر ایک دن ممبئی میں بی سی سی آئی کے ہیڈکوارٹر ضرور پہنچیں گی۔تاہم بی سی سی آئی سیکریٹری نے ٹرافیوں کی بھارت واپسی کے حوالے سے کسی حتمی تاریخ یا ٹائم لائن کا اعلان نہیں کیا تھا۔
