اسلام آباد (نیوز ڈیسک) پاکستانی کرکٹر حیدر علی کے خلاف مبینہ ریپ کیس ناکافی شواہد کے باعث خارج کر دیا گیا ہے۔ پولیس حکام کے مطابق، تحقیقات کے بعد کسی قسم کا الزام ثابت نہیں ہوسکا، جس کے بعد حیدر علی کو جلد پاسپورٹ بھی واپس کر دیا جائے گا۔ذرائع کا کہنا ہے کہ کیس ختم ہونے کے بعد کرکٹر حیدر علی اب آزادانہ طور پر برطانیہ آمد و رفت کر سکیں گے۔ پولیس نے اس معاملے کی مکمل چھان بین کے لیے اضافی وقت لیا تھا، تاہم شواہد ناکافی ثابت ہونے پر کیس بند کر دیا گیا۔

خیال رہے کہ حیدر علی کو دو ہفتے قبل اس وقت گرفتار کیا گیا تھا جب ایک خاتون نے ان پر 23 جولائی کو مانچسٹر کی حدود میں جنسی زیادتی کا الزام عائد کیا۔ اس شکایت کے بعد پولیس نے 4 اگست کو باقاعدہ کارروائی کی اور 24 سالہ کھلاڑی کو ضمانت پر رہائی دی گئی۔یہ معاملہ پاکستان شاہینز کرکٹ ٹیم کے حالیہ دورہ انگلینڈ کے دوران پیش آیا تھا۔ دوسری جانب پاکستان کرکٹ بورڈ (پی سی بی) نے بھی اس کیس کے باعث حیدر علی کو معطل کر دیا تھا اور کہا تھا کہ وہ مانچسٹر پولیس کی تحقیقات کا حصہ ہیں۔