برسبین(این این آئی)پاکستان کرکٹ ٹیم کے کپتان محمد رضوان نے کہا ہے کہ ٹی ٹوئنٹی سیریز میں بھی آسٹریلیا کو واش آؤٹ کریں گے۔ڈریسنگ روم میں کھلاڑیوں سے خطاب کرتے ہوئے محمد رضوان نے کہا کہ پاکستان ٹیم ایک ہے اور متحد ہو کر کھیلی، ٹیم سے کوئی اْمید نہیں کر رہا تھا کہ آسٹریلیا میں آسٹریلیا کو ہرائیں گے۔

انہوں نے کہا ک مجھے پوری اْمید ہے دنیا کی ٹیموں نے ہم سے سیکھا ہو گا، آسٹریلیا سے جیت سے سیکھنے کا عمل شروع ہوا ہے۔محمد رضوان نے کہا کہ ہمارے گولز اور ہدف بڑے بڑے ہونے چاہئیں، چیمپئنز ٹرافی، ورلڈ کپ اور اولمپکس جیسے ٹائٹل جیتنے ہیں، کسی بھی ملک جائیں گے، تاریخ رقم کریں گے۔کپتان نے کہا کہ 22 سال اور 23 سال سے نہ جیتنے والی باتیں ختم کریں گے، کرکٹ میں جیت کی نئی تاریخیں درج کریں گے، ہم سب ایک ہو کر ایک جذبے کے ساتھ کھیلیں گے۔انہوںنے کہاکہ میں سب سے فیڈ بیک لیتا رہا، مینجمنٹ اور کھلاڑیوں سے مشورے کرتا رہتا ہوں، ون ڈے سیریز جیتنے کی خوشیاں منائیں لیکن پاکستانی ستارے کا خیال رکھیں، خوشی میں کوئی ایسا کام نہ ہو جائے کہ ہمارا ستارا اثر انداز ہو۔