دبئی (این این آئی)سابق ٹینس اسٹار ثانیہ مرزا نے اپنے بیٹے اذہان مرزا ملک پر فخر کا اظہار کیا ہے۔ثانیہ مرزا نے اپنے بیٹے اذہان مرزا ملک کی ایک ویڈیو اپنے انسٹاگرام اکانٹ پرشیئر کی ہے۔ثانیہ مرزا نے اذہان کی یہ ویڈیو اپنی والدہ کے اکائونٹ سے ری شیئر کی ہے۔اذہان مرزا ملک اس ویڈیو میں اپنی والدہ کے نقشِ قدم پر چلتے ہوئے ٹینس کھیل رہے ہیں۔

اذہان مرزا ملک کو اس ویڈیو میں بالکل ایک پیشہ ور ٹینس کھلاڑی کی طرح کھیلتے ہوئے دیکھا جا سکتا ہے۔یاد رہے کہ ثانیہ اور شعیب ملک نے 23 اپریل 2018 کو سوشل میڈیا کے ذریعے اپنے ہاں ننھے مہمان کی آمد کا اعلان کیا تھا، ان کے ہاں اذہان کی پیدائش 30 اکتوبر 2018 کو ہوئی تھی۔19جنوری 2024 کو شعیب نے پاکستانی ٹی وی اداکارہ ثنا جاوید سے کراچی میں اپنے گھر پر ایک نجی تقریب کے دوران شادی کر لی تھی۔بعد ازاں ثانیہ مرزا کے والد نے بیٹی کی خلع کا اعلان کیا تھا۔