لاہور(این این آئی)پاکستان کرکٹ ٹیم کے اوپنر بلے باز امام الحق اور ناروے کی ڈاکٹر انمول محمود کی شادی کی تقریبات کے سلسلے میں منعقدہ قوالی نائٹ میں سابق کپتانوں بابر اعظم اور سرفراز احمد نے چار چاند لگا دیے۔مختلف سوشل میڈیا پلیٹ فارمز پر کھلاڑی امام الحق اور انمول محمود کی لاہور میں منعقدہ قوالی نائٹ سے خوبصورت و یادگار تصاویر و ویڈیوز سوشل میڈیا کی زینت بنی ہوئی ہیں۔
قوالی کے موقع پر امام کی انمول نے سلور رنگ کے جوڑے جبکہ امام الحق نے سیاہ رنگ کے کرتا پاجاما کا انتخاب کیا۔ان وائرل ویڈیوز میں قومی کرکٹ ٹیم کے سابق کپتانوں بابر اعظم اور سرفراز احمد سمیت دیگر کھلاڑیوں کو سیاہ لباس میں ملبوس معروف قوال حمزہ اکرم کی قوالیوں سے لطف اندوز ہوتے ہوئے دیکھا جا سکتا ہے۔
اس موقع پر بابر اور سرفراز کے ساتھ دیگر پاکستانی کرکٹرز عثمان قادر، کامران اکمل اور سابق چیف سلیکٹر انضمام الحق، وقار یونس، اظہر علی بھی موجود تھے جو اس تقریب سے بھرپور انداز میں لطف اندوز ہوئے۔مختلف وائرل ویڈیوز میں کھلاڑی امام الحق اپنی قوالی نائٹ پر گائیک بن گئے اور قوال کے سْر سے سْر ملاتے ہوئے بھی دکھائی دئیے۔ قوالی کی تقریب میں شوبز شخصیات عاصم اظہر، میرب سمیت سوشل میڈیا انفلوئنسر اور معروف ٹک ٹاکرز اقراء کنول، سعد رحمن (ڈکی بھائی) اور عروب جتوئی نے بھی شرکت کی جنہوں نے بابر اعظم اور دیگر کھلاڑیوں کے ساتھ اپنی تصاویر کو سوشل میڈیا پر شیئر کیا ہے۔
