لاہور (آن لا ئن) آل راؤنڈر محمد حفیظ 7000 ٹی ٹونٹی رنز مکمل کرنے والے 22 ویں بلے باز بن گئے۔ حفیظ نے ہرارے میں دوسرے ٹی ٹونٹی میں پاکستان کو زمبابوے کے خلاف شرمناک شکست کے دوران ذاتی سنگ میل عبور کیا۔ حفیظ اس سنگ میل تک پہنچنے والے دوسرے پاکستانی بلے باز ہیں ، ان کے علاوہ شعیب ملک 7000 سے زیادہ رنز بنانے والے واحد پاکستانی بلے باز ہیں ،
شعیب ملک 389 اننگز میں 10488 رنز بنا چکے ہیں اور ٹی 20 تاریخ میں سب سے زیادہ رنز بنانے والے بلے بازوں کی فہرست میں تیسرے نمبر پر ہیں۔حفیظ پچھلے کچھ سالوں سے پاکستان کے ٹی ٹونٹی ٹیم کا اہم حصہ ہیں ، انہوں نے 2020ء میں ٹی ٹونٹی کرکٹ میں سب سے زیادہ 415 رنز بنائے جس میں 4 نصف سنچریاں شامل تھیں اور انہوں نے اپنے کیریئر کا بہترین سکور99 ناٹ آئوٹ بھی بنایا۔حفیظ ایک طویل عرصے سے قومی ٹیم میں شامل ہیں ، انہوں نے حال ہی میں پاکستان کے لئے اپنا 100 واں ٹی ٹونٹی کھیلا۔ وہ 2005ء� میں انگلینڈ کے خلاف پہلا ٹی ٹونٹی میچ کھیلنے والی قومی ٹیم میں بھی شامل تھے جس میں انہوں نے 46 رنز بنائے اور پاکستان نے اپنا پہلا ٹی ٹونٹی 5 وکٹوں سے جیتا۔40 سالہ حفیظ 2021ء میں خراب فارم کا شکار ہیں اور 6 اننگز میں 13.00 کی اوسط سے صرف 65 رنز بناسکے ہیں۔ وہ اتوار کو کھیلے جانے والے زمبابوے کے خلاف سیریز کے فیصلہ کن میچ میں دوبارہ فارم بحال کرنے کیلئے پرعزم ہیں۔ حفیظ نے حال ہی میں انکشاف کیا ہے کہ اس وقت ان کا ہدف اکتوبر سے نومبر میں بھارت میں ہونے والے ٹی ٹونٹی ورلڈ کپ میں پاکستان کی نمائندگی کرنا ہے اور انہیں اس کے لیے جلد از جلد فارم میں واپس آنے کی ضرورت ہوگی۔
