اسلام آباد(مانیٹرنگ ڈیسک )آخری اوورز میں بائولر ز کی نپی تلی بائولنگ ، پاکستان نے تیسرا ٹی ٹوئنٹی میچ جیت لیا،سیریزبھی  پاکستان کے نام ، تفصیلات کے مطابق تیسرے ٹی ٹوئنٹی میچ میں پاکستان کی جانب سے دئیے گئے 165رنز کے ہدف کے تعاقب میں زمبابوے نے12اوورز

تک پراعتماد بیٹنگ کی، زمبابوے نے 12اوورز میں ایک وکٹ کے نقصان پر 92رنز سکور کر لئے تھے لیکن اس کے بعد زمبابوے بلے باز ٹارگٹ حاصل کرنے میں ناکام رہے اور زمبابوے مقررہ اوورز میں 7وکٹ پر 141رنز بنا سکا، زمبابوے کو آخری 6گیندوں پر 31رنز کی ضرورت تھی لیکن ناتجربہ کاری آڑے آگئی ،حسن علی نے میچ میں ٹرننگ پوائنٹ ثابت ہوئے ، انہوں نے 4قیمتی وکٹیں حاصل کیں ۔ جیت پر پاکستانی سکواڈ نے جشن منایا، یاد رہے کہ پہلے میچ میں پاکستان فاتح رہا تھا لیکن دوسرے میچ میں اپ سیٹ ہوا اور زمبابوے کے ہاتھوں شکست کا سامنا کرنا پڑا تھا۔ دوسری جانب قومی ٹیم کے کپتان بابر اعظم نے بھارتی کرکٹ ٹیم کے قائد ویرات کوہلی کا ایک اور ریکارڈ توڑ دیا،بابراعظم نے ٹی ٹوئنٹی انٹرنیشنلز میں تیز ترین 2000 رنز مکمل کر لیے۔بابراعظم نے کیرئیر کی 52 ویں اننگز میں 2000 رنز کا سنگ میل عبور کیا جبکہ ویرات کوہلی نے 56 اننگز میں تیز ترین 2000 ٹی ٹوئنٹی انٹرنیشنل رنز بنائے تھے۔بابر اعظم ٹی ٹوئنٹی انٹرنیشنلز میں 2000 رنز بنانے والے تیسرے پاکستانی کرکٹر ہیں۔ اس سے قبل محمد حفیظ اور شعیب ملک بھی 2000 ٹی ٹوئنٹی انٹرنیشنلز رنز بناچکے ہیں۔بابر مجموعی طور پر ٹی ٹوئنٹی انٹرنیشنلز میں دو ہزار رنز بنانے والے دنیا کے گیارہویں بیٹسمین ہیں۔