لاہور( این این آئی)ایڈیشنل سیشن جج نے قومی کرکٹر بابر اعظم کے خلاف بلیک میل اور ہراساں کرنے پر ایف آئی اے میں اندراج مقدمہ کیلئے دائر درخواست پر مقدمہ درج کرنے کا حکم دیدیا ۔ایڈیشنل سیشن جج نے خاتون حامیزہ مختار کی درخواست پر سماعت کی ۔ دوران سماعت ایف آئی اے سائبر کرائم نے اپنی رپورٹ عدالت میں جمع کرائی ۔

ایف آئی اے کی رپورٹ میں بتایا گیا کہ مدعیہ حامیزہ مختار نے مذکورہ نمبروں کے خلاف دھمکانے ،بلیک میل کرنے اورنازیبا پیغامات بھیجنے سے متعلق درخواست دی،انکوائری کے دوران مدعیہ کو نوٹس جاری کیا اور بیان ریکارڈ کیاگیا، فراہم کیے گئے نمبر مریم احمد ،محمد بابراور سلیمی بی بی کے نام رجسٹرڈ تھے،رجسٹرڈ نمبر کے مالکان کو نوٹسز جاری کرکے طلب کیا گیا ،نوٹسز میں الزام الہیان کو بیان ریکارڈ کرنے موقف دینے کے لیے طلب کیا گیا ،الزام الہیان کو تین مرتبہ نوٹسز جاری کرکے طلب کیا گیا ،بابر اعظم بھی انکوائری میں شامل نہیںہوا،بابر اعظم کی جگہ اس کا بھائی فیصل اعظم پیش ہوا اور بابر اعظم کے پیش ہونے کے مہلت طلب کی،بابر اعظم اب تک انکوائری میں شامل نہیں ہوااور بیان بھی ریکارڈ نہیں کروایا، رپورٹ میں کہا گیا ہے کہ بابر اعظم اس معاملے میں قصور وار پایا گیا ہے ،سلیمی بی بی نے تین نوٹسزوصول کرنے کے باوجود اپنا بیان ریکارڈ نہ کروایا،مریم احمد انکوائری میں شامل ہوئی لیکن مدعیہ کو پہچاننے سے انکار کردیا،مریم احمد نے اپنے نمبر سے مدعیہ کو نازیبا پیغامات بھجوانے سے انکاری کا بیان دیا،مریم احمد کو اس کا موبائل فرانزک کیلئے جمع کرانے کا کہا گیا جو اس نے نہیں دیا۔ایڈیشنل سیشن جج حامد حسین نے حامیزہ مختار کی درخواست پر فیصلہ سناتے ہوئے ذمہ داروں کے خلاف قانونی کارروائی مکمل کرکے مقدمہ درج کرنے کا حکم دیدیا۔

موضوعات:بابر اعظم