لاہور( این این آئی )پاک جنوبی افریقہ ٹی ٹونٹی سیریز میں سکیورٹی کے پیش نظر اسٹیڈیم اور اطراف ریسٹورنٹس کو سات روز پہلے ہی بند کرا دیا گیا ۔تفصیلات کے مطابق پاک جنوبی افریقہ ٹی ٹونٹی سیریز کے آغاز سے سات روز قبل ہی قذافی سٹیڈیم اور اطراف کے تمام ریسٹورنٹس بغیر نوٹس سیل کر دئیے گئے ہیں۔ مالکان کے مطابق اس
اقدام سے لاکھوں روپے کا سامان ضائع جبکہ سینکڑوں لوگ بیروزگار ہوگئے ہیں۔ ریسٹورنٹس بند ہونے سے مالی نقصان کا ذمہ دار کون ہوگا۔چیئرمین پاکستان ریسٹورنٹس یونٹی عامر رفیق قریشی اس حوالے سے ہفتہ کے روز پریس کانفرنس کریں گے۔ یاد رہے پاک جنوبی افریقہ کے درمیان پہلا ٹی ٹونٹی گیارہ فروری کو قذافی سٹیڈیم میں کھیلا جائے گا۔دوسری جانب پاکستان جنوبی افریقہ ٹی ٹونٹی سیریز کے سکیورٹی پلان میں بڑی تبدیلی کر دی گئی، کرکٹ ٹیموں کی الگ الگ موومنٹ کی بجائے دونوں ٹیمیں اکھٹی اسٹیڈیم پہنچیں گی۔4 فروری کو ریہرسل کے دوران ٹریفک کی شدید بدنظمی دیکھی گئی او ر اس کی وجہ سے شہری گھنٹوں ٹریفک میں پھنسے رہے ۔سی سی پی او لاہور اور سی ٹی او نے عوام کو مزید پریشانی سے بچانے کے لیے بڑا فیصلہ کیا جس کے مطابق دونوں ٹیمیں ایک ساتھ ایک ہی روٹ پر سفر کر کے سٹیڈیم تک پہنچیں گی۔ٹریفک پولیس کی جانب سے ایک ٹیم کو ہوٹل سے سٹیڈیم تک پہنچانے کیلئے بیس منٹ ٹریفک مکمل بند کرنا پڑتی تھی، دونوں ٹیموں کی موومنٹ کے دوران چالیس منٹ تک ٹریفک بند رہنے سے ملحقہ سڑکوں پر بے پناہ رش ہو جاتا تھا۔ ٹریفک پولیس کے مطابق چالیس منٹ کی ٹریفک کو بحال کرنے کے لیے تین گھنٹے کا وقت درکار ہوتا ہے اور تین گھنٹے تک شہریوں کو شدید مشکلات کا سامنا رہتا تھا۔سی سی پی او غلام محمود ڈوگر کا کہنا تھا کہ اب موومنٹ کے دوران پولیس اور حساس اداروں کی نفری کو ڈبل کر دیا گیا ہے تاکہ ایک ہی وقت میں ٹریفک کو بند کیا جا سکے۔
