دبئی(آن لائن) انٹر نیشنل کرکٹ کونسل (آئی سی سی )نے رواں سال کا ٹی ٹوئنٹی کرکٹ ورلٖڈ کپ کورونا وائرس کے باعث ملتوی کردیا۔ ایونٹ 18اکتوبر سے 15نومبر کے درمیان آسٹریلیا میں شیڈول تھا جس کا انعقاد اب نومبر 2021 میں ہوگا۔ تاہم میزبان ملک کا نام فی الحال اعلان نہیں کیا گیا۔ تفصیلات کے مطابق پیر کے روز انٹرنیشنل کرکٹ کونسل کا ٹیلی کانفرنس بورڈ اجلاس منعقد ہوا جس میں کورونا وائرس وبا کے پیش نظر رواں برس ٹی ٹوئنٹی کرکٹ ورلڈ کپ ملتوی
کر دیا گیا ہے۔ ایونٹ 18اکتوبر سے 15نومبر کے درمیان آسٹریلیا میں شیڈول تھا لیکن میزبان ملک نے ایونٹ ملتوی کرنے کی درخواست کی تھی۔ ملتوی ہونے والا ٹوئنٹی ٹوئنٹی کرکٹ ورلڈ کپ اب آئندہ برس نومبر میں منعقد ہوگا۔ 2021کا ٹی ٹوئنٹی کرکٹ ورلڈ کپ بھارت میں شیڈول تھا جو اب 2022میں منعقد ہوگا لیکن آئی سی سی نے 2020اور 2022کے ملتوی شدہ ورلڈ کپ کے دوبارہ 2021اور 2022میں انعقاد کے لئے میزبان ملکوں کا اعلان نہیں کیا ہے۔
