اسلام آباد (این این آئی)اداکار فہد مصطفیٰ نے ڈومیسٹک کرکٹ میں ڈبل سنچری کے باوجود فواد عالم کو نظر انداز کیے جانے پر پاکستان کرکٹ بورڈ (پی سی بی) پر برہمی کا اظہار کیا ہے۔گزشتہ روز فواد عالم نے ڈومیسٹک کرکٹ میں اپنے کیرئیر کی چوتھی ڈبل سنچری اسکور کر کے فرسٹ کلاس کرکٹ میں 12 ہزار رنز کا سنگ میل عبور کیا جسے کرکٹ شائقین کی جانب سے قابل ستائش قرار دیا گیا۔ایسے میں اداکار فہد مصطفیٰ نے بھی فواد عالم کی آؤٹ کلاس پرفامنس پر خوب داد دی مگر پی سی بی سے ان کو قومی ٹیم میں شامل نہ کرنے پر
غصے کا اظہار کیا۔اداکار نے اپنی ایک ٹوئٹ میں لکھا کہ اگر ڈومیسٹک پرفارمنس کو کچھ سمجھا نہیں جاتا تو پھر ان ٹورنامنٹس کا مقصد کیا ہے؟۔فہد مصطفی نے فواد عالم کو مخاطب کرتے ہوئے کہا کہ کم از کم ٹیسٹ اسکواڈ کے لیے تو آپ یقینناً حقدار ہیں۔بعدازاں پی سی بی انتظامیہ کو مخاطب کرتے ہوئے اداکار نے لکھا کہ امید ہے کہ پی سی بی فواد عالم کی کارکردگی کو دیکھ رہا ہے۔واضح رہے کہ فواد عالم نے پاکستان کی جانب سے اپنا آخری ٹیسٹ 10 سال قبل نیوزی لینڈ کے خلاف کھیلا تھا جب کہ آخری ون ڈے انہوں نے 2015 میں کھیلا تھا۔
