اسلام آباد(این این آئی) پاکستان کرکٹ بورڈ کے زیر اہتمام ملک بھر میں انڈر19کی چھ ٹیموں کیلئے ٹرائلز (آج) پیر19اگست سے شروع ہوںگے، جس کے بعد16، 16 کھلاڑیوں پرمشتمل ایک ایک ٹیم تشکیل دی جائے گی۔تفصیلات کے مطابق پاکستان کرکٹ کا نیا ڈومیسٹک سسٹم تیار کرلیا گیا، پی سی بی کے زیرانتظام چھ صوبائی ٹیموں کے انتخاب کے لئے ٹرائلز کا شیڈول تیار کرلیا گیااس سلسلے میں ملک بھرمیں19 سے25 اگست تک ٹرائلز منعقد ہوں گے۔ذرائع کے مطابق صوبہ سندھ انڈر19 کے ٹرائلز19 اور20 اگست کو نیشنل

اسٹیڈیم میں ہوں گے،بلوچستان انڈر19ٹرائلز22اور 23 اگست کوبگٹی اسٹیڈیم میں منعقد ہوں گے جبکہ ساؤتھ پنجاب کے ٹرائلز24اور25 اگست کو ملتان اسٹیڈیم میں ہوں گے اس کے علاوہ سینٹرل پنجاب کے ٹرائلز24 اور25 اگست کو ایل سی سی اے گراؤنڈ میں اور ناردرن انڈر19 ٹرائلز24اور25 اگست کو ڈائمنڈ کلب اسلام آباد میں ہوں گے۔ذرائع کے مطابق کے پی انڈر19ٹرائلز24اور25اگست کو حیات آباد اسپورٹس کمپلیکس میں منعقد ہونگے، ان ٹرائلز کے اختتام بعد16 ، 16 کھلاڑیوں پرمشتمل ایک ایک ٹیم تشکیل دی جائیگی۔