اسلام آباد (این این آئی)پاکستان سپورٹس کمپلیکس اسلام آباد میں فیڈرل باسکٹ بال ایسوسی ایشن کے زیر اہتمام مون سون شجرکاری مہم کے تحت بڑی تعداد میں پودے لگائے گئے ۔ تفصیلات کے مطابق مون سون مہم کے تحت پودے لگانے کی تقریب میں پاکستان سپورٹس بورڈ کے ڈپٹی ڈائریکٹر جنرل منصور احمدخان ،فیڈرل باسکٹ بال ایسوسی ایشن کے سیکرٹری اوج ظہور سمیت قومی باسکٹ بال پلیئرز اور آفیشلز نے شرکت کی ۔ اس موقع پر ڈپٹی ڈائریکٹر جنرل پاکستان سپورٹس بورڈ منصور احمد خان کا کہنا تھا کہ درخت زندگی ہیں۔
کھلاڑیوں کو بھی بڑھ چڑھ اس مہم میں حصہ لینا چاہیے اور وہ زیادہ سے زیادہ اپنے گھروں میں بھی پودے لگائے ۔ انہوں نے کہاکہ وفاقی وزیر ڈاکٹر فہمیدہ مرزا نے بھی شجر کاری مہم کے حوالے سے خصوصی ہدایات جاری کر رکھی ہیں ، درخت ماحولیاتی آلودگی کے خاتمے میں اہم کردار ادا کرتے ہیں۔ شہریوں کو چاہئے کہ وہ زیادہ سے زیادہ پودے لگا کر ماحول کو آلودہ ہونے سے بچائیں ۔ انہوں نے کہاکہ شجرکاری ایک قومی ذمہ داری ہے اور اس ذمہ داری میں معاشرے کے تمام طبقات کو حکومت کا ہاتھ بٹانا ہوگا۔
