لاہور(این این آئی)پاکستان کے سابق مایہ ناز آل راؤنڈر عبدالرزاق نے بھارتی کرکٹ بورڈ کو کوچنگ کی خدمات کی پیشکش کر دی۔عبدالرزاق کے مطابق بھارتی ہارڈک پانڈیا میں دنیا کا بہترین آل راؤنڈر بننے کی بے پناہ صلاحتیں موجود ہیں لیکن اس میں ابھی بہت سی خامیاں بھی ہیں جن کو دور کرکے اسے دنیا کا بہترین آل راؤنڈر بنایا جاسکتا ہے، بھارتی کرکٹ بورڈ اگر چاہے تو میں اس کی خامیوں کو دور کرنے کے لئے تیار ہوں۔نجی ٹی وی کے مطابق عبدالرزاق کا کہنا ہے کہ ویسٹ انڈیز

کے خلاف میچ کے دوران میں نے پانڈیا کی بیٹنگ اور بولنگ کا بغور جائزہ لیا ہے جس کے بعد میں اس نتیجہ پر پہنچا ہوں کہ عمدہ کارکردگی کے باوجود اس میں بڑی خامیاں موجود ہیں، اگر مجھے یو اے ای سمیت کسی اور جگہ پر کوچنگ کا موقع دیا جائے تو میں یہ خامیاں دور کر سکتا ہوں۔یاد رہے کہ اس سے قبل عبدالرزاق نے پاکستان کرکٹ بورڈ کو بھی کوچنگ کے لیے اپنی خدمات پیش کیں تھیں لیکن بورڈ حکام کی طرف سے اس پیشکش کا مثبت جواب نہیں مل سکا ہے۔

موضوعات:عبدالرزاق