اسلام آباد (این این آئی) وزیراعظم محمد نواز شریف نے کرکٹ کے سینئر کھلاڑیوں یونس خان، مصباح الحق اور شاہد آفریدی کیلئے بھی ایک ایک کروڑ روپے کا اعلان کیا ہے ۔یہ اعلان منگل کو وزیراعظم ہاؤس میں آئی سی سی چمپئنز ٹرافی جیتنے والی ٹیم اور انتظامیہ کے اعزاز میں دی گئی استقالیہ تقریب کے بعد کیا گیا۔
تقریب کے دوران وزیراعظم محمد نواز شریف نے قومی ٹیم کے کھلاڑیوں کیلئے ایک ایک کروڑ، ملکی وغیر ملکی کوچز کیلئے50،50 لاکھ اور دیگرآفیشلز کیلئے 25،25لاکھ روپے کے چیک تقسیم کئے۔وزیراعظم نے چیف سلیکٹر انضمام الحق کو بھی ایک کروڑ روپے کا چیک دیا۔وزیراعظم ہاؤس سے جاری بیان کے مطابق سینئر کھلاڑیوں یونس خان، مصباح الحق اور شاہد آفریدی کو ایک ایک کروڑروپے دینے کا اعلان کیا گیا ہے۔
