لاہور(آئی این پی )پاکستان سپر لیگ کا فائنل کھیلنے کے لئے پشاور زلمی کے غیر ملکی کھلاڑیوں سمیت پوری ٹیم اور دیگر عملہ پاکستان پہنچ گیا ۔ پی ایس ایل کے فائنل میں کوئٹہ گلیڈی ایٹرز کا مقابلہ کرنے کے لئے پشاور زلمی کے کھلاڑی دبئی سے لاہور کے علامہ اقبال انٹرنیشنل ایئرپورٹ پہنچے جہاں سے کھلاڑیوں کو بلٹ پروف گاڑیوں کے ذریعے ہوٹل منتقل کیا جائے گا۔ اس موقع پر سیکیورٹی کے انتہائی سخت
انتظامات کئے گئے ۔ پاکستان پہنچنے والے کھلاڑیوں میں پشاور زلمی کے کپتان ڈیرن سیمی، کرس جورڈن، ڈیوڈ ملان، مارلن سیموئلز اور سمت پٹیل شامل ہیں، اس کے علاوہ کامران اکمل، محمد حفیظ، وہاب ریاض، حسن علی اور افتخار احمد بھی لاہور پہنچ چکے ہیں، پشاور زلمی کے مالک جاوید آفریدی اور دیگر عملہ بھی لاہور پہنچ گیا ۔ غیر ملکی کمنٹیٹرز کے پاکستان نہ آنے کے باعث پی ایس ایل کے فائنل میں وسیم اکرم، وقار یونس اور رمیز راجہ کمنٹری کے فرائض انجام دیں گے۔ واضح رہے کہ پی ایس ایل کے دوسرے ایڈیشن کا فائنل کل قذافی اسٹیڈیم لاہور میں کوئٹہ گلیڈی ایٹیرز اور پشاور زلمی کی ٹیموں کے درمیان کھیلا جائے گا۔پاکستانی کرکٹ شائقین نے ڈیرن سیمی، کرس جورڈن، ڈیوڈ ملان، مارلن سیموئلز اور سمت پٹیل کا پاکستان آمد پر زبردست خیر مقدم کیا ہے اور ا ن کو خراج تحسین پیش کیا ہے ۔واضح رہے کہ پاکستان میں سیکورٹی خدشات کی وارننگز کے باوجود یہ وہ اہم کھلاڑی ہیں جنہوں نے دبئی اورشارجہ میں بھی اپنی ٹیم کا بھرپور ساتھ نبھایا اور فائنل کے لئے لاہور بھی پہنچے ہیں۔
