اسلام آباد(مانیٹرنگ ڈیسک) متحدہ عرب امارات میں ہونے والے پاکستان سپر لیگ کے لاہور قلندرز بمقابلہ اسلام آباد یونائیٹڈ میچ پر وہاب ریاض اور ان کی اہلیہ کے درمیان دلچسپ نوک جھونک ۔تفصیلات کے مطابق پاکستان سپر لیگ سیزن ٹو میں پیرکو کھیلے گئے واحد میچ جو کہ لاہور قلندرز اور اسلام آباد یونائیٹڈ کے درمیان کھیلا گیا کے بعد
سماجی رابطے کی ویب سائٹ ٹوئٹر پر اس وقت دلچسپ صورتحال دیکھنے میں آئی جب پشاورزلمی کی جانب سے کھیلنے والے وہاب ریاض کی اہلیہ نے سماجی رابطے کی ویب سائٹ ٹوئٹر پر اپنے پیغام میں لاہور قلندرز کو میچ جیتنے پر مبارکبا دیتے ہوئے میں کہا کہ’’کیا دلچسپ مقابلہ تھا، لاہور قلندرز مبارک ہو، اب پاکستان سپر لیگ میں کوئی بھی ٹیم آگے بڑھ سکتی ہے اور فائنل تک پہنچ سکتی ہے۔‘‘وہاب ریاض نے اہلیہ کے ٹویٹ میں جواب میں ٹویٹ کیا کہ ’’جان! باقی ٹیموں کی فکر چھوڑو پشاور زلمی کی فکر کرو۔ آپ کو پشاور زلمی کو سپورٹ کرنا ہوگا ورنہ لاہور صرف تین گھنٹے دور ہے‘‘۔وہاب ریاض کی ٹویٹ کے جواب میں ان کی اہلیہ نے ٹویٹ کیا ’’میں پشاور زلمی ہی کو سپورٹ کر رہی ہوں ویسے بھی آخر میں جیت تو پاکستان ہی کی ہونی ہے اور ویسے بھی جان !آپ میری فکرنہ کریں بس آخری دو میچوں میں جیت کو یقینی بنائیں ورنہ آپ کو لاہورمجھ سے پہلے ہی واپس جانا پڑے گا‘‘۔واضح رہے کہ پاکستان سپر لیگ سیزن ٹو میں پیرکو کھیلے گئے واحد میچ میں لاہور قلندرزنے اسلام آباد یونائٹیڈکو سنسنی خیز مقابلے میں ہرا دیا تھا۔لاہور قلندرز کو اسلام آباد یونائٹیڈکے خلاف جیت کے لیے آخری اوور میں چھ رنز درکار تھے اور ان کی دو وکٹیں باقی تھیں محمد سمیع کی پہلی گیند پر عامر یامین آئوٹ ہوکر پویلین لوٹ گئے تواگلی گیند پر نئے آنے والے بلے باز گرانٹ ایلیٹ نے محمد سمیع کو ایک بلند وبالا چھکا لگا کر قلندرز کو فتح سے ہمکنار کرا دیاتھا۔
