اسلام آباد (این این آئی) اسلام آباد یونائیٹڈ کے کپتان مصباح الحق نے کہاہے کہ دو کرکٹرز کی معطلی کے بعد پاکستانی کرکٹرز کو زیادہ ذمہ داری کا مظاہرہ کرنا ہوگا۔مصباح الحق نے ایک انٹرویومیں کہا کہ فی الحال یہ کہنا بہت مشکل ہے کہ ان دو کرکٹرز کی معطلی کے واقعہ کے آنے والے دنوں میں کیا اثرات مرتب ہوں گے لیکن جو کچھ بھی ہوا ان کیلئے انتہائی تکلیف دہ اور مایوس کن تھا۔مصباح الحق نے کہا کہ وہ کوشش کررہے ہیں کہ اس واقعہ کے اثرات سے نکلتے ہوئے آگے بڑھنے کی کوشش کی جائے۔مصباح الحق نے کہا کہ
2010 میں سپاٹ فکسنگ سکینڈل کے بعد اسی بات کی کوشش کی جاتی رہی کہ پاکستان کی کرکٹ دوبارہ اس طرح کی صورتحال سے دوبارہ دوچار نہ ہو لیکن اب یہ واقعہ رونما ہوگیا لہٰذا اب ہمیں ایک بار پھر محتاط ہونا پڑیگا اور کرکٹ پر بہت زیادہ توجہ دینی ہوگی۔مصباح الحق نے کہاکہ پاکستان کرکٹ بورڈ اور آئی سی سی کو اپنے اقدامات میں مزید سختی لانی ہوگی اور ساتھ ساتھ کرکٹرز کو کرپشن کے بارے میں مزید تعلیم اور معلومات فراہم کرکے اس کے خطرات سے آگاہ کرنا ہوگا۔
