اسلام آباد(مانیٹرنگ ڈیسک) پاکستان تحریک انصاف کے سربراہ اور پاکستان کرکٹ ٹیم کے سابق کپتان عمران خان نے دلچسپ انکشاف کر دیا۔عمران خان نے کراچی جلسے سے خطاب کرتے ہوئے واقعہ سنایا کہ میری کپتانی میں تاریخ میں پہلی بار پاکستانی کرکٹ ٹیم بھارت میں سیریز جیتنے والی تھی۔ پاکستان کو فتح سے دور رکھنے کیلئے بھارتی ایمپائر سیریز میں تعینات تھے۔ جب سیریز کا فائنل میچ تھا تو کانٹے دار مقابلہ چل رہا تھا۔ اس وقت میری ٹیم میں سب سے زیادہ محب الوطن اور فائٹ کرنے والا کھلاڑی جاوید میانداد تھا۔ جب بھی ہم کوئی آؤٹ کی اپیل کرتے تو بھارتی ایمپائر ناٹ آؤٹ قرار دے دیتے۔ اس وقت جاوید میانداد کو بھارتی ایمپائرز پر شدید غصہ آتا ۔ عمران خان نے انکشاف کرتے ہوئے کہا کہ اس میچ میں تین چار بار ایسا ہوا کہ ہم نے اپیل کی اور ایمپائر نے بھارت کی طرف جھکاؤ رکھتے ہوئے آؤٹ نہیں دیا۔
ہر بار جارحانہ اپیل کرتے ہوئے میانداد ایمپائر کی جانب دوڑ لگا دیتا تھا۔ جب پانچویں بار ایمپائر سے ایل بی ڈبلیو آؤٹ کی اپیل کی گئی تو جاوید میانداد نے انتہائی جارحانہ انداز میں ایمپائر کی جانب دوڑ لگا دی، اس وقت میانداد کی آنکھوں میں خون سوار تھا اور مجھے خطرہ پڑ گیا کہ کل ہماری جیت کی خبروں کی بجائے یہ خبریں نشر نہ ہو جائیں کے جاوید میانداد نے بھارتی ایمپائر کو قتل کر دیا۔ عمران خان نے کہا کہ جب بھی میانداد ایمپائر کی جانب دوڑ لگاتا میں ایمپائر اور میانداد کے درمیان حائل ہو جاتا تھا۔ میانداد ایک بہترین حب الوطن پاکستانی کھلاڑی تھا جو ٹیم کیلئے اپنی جان لڑا دیتا تھا۔

موضوعات:پاک بھارت میچ جاوید میانداد عمران خان