نئی دہلی (نیوزڈیسک)بھارتی ٹینس سٹار ثانیہ مرزا اور انکی سوئس جوڑی دار مارٹینا ہنگس فتوحات برقرار رکھتے ہوئے سڈنی انٹرنیشنل ٹینس ٹورنامنٹ ویمنز ڈبلز سیمی فائنل میں پہنچ گئیں۔ مرزا اورمارٹینا ہنگس نے کوارٹر فائنل میں چینی جوڑی کو سٹریٹ سیٹس میں زیر کرکے ایونٹ کے ٹاپ فور کے لئے کوالیفائی کیا۔ آسٹریلیا میں جاری ایونٹ میں بدھ کو کھیلے گئے ویمنز ڈبلز ایونٹ کے کوارٹر فائنل میچ میں بھارت کی ثانیہ مرزا اور ان کی سوئس جوڑی دار مارٹینا ہنگس نے عمدہ کارکردگی کا مظاہرہ کرتے ہوئے شوائی پینگ اور انکی ہم وطن جوڑی دار لیانگ چن پر مشتمل چینی جوڑی کو سٹریٹ سیٹس میں 6-2 اور 6-3 سے زیر کر کے ایونٹ کے سیمی فائنل میں پہنچنے کا اعزاز حاصل کیا، مرزا اور ہنگس سال کے دوسرے ٹائٹل کی طرف گامزن ہیں، اس سے قبل دونوں نے برسبین ٹائٹل جیت کر سال کا شاندار انداز سے آغاز کیا تھا۔