سڈنی(نیوز ڈیسک)آسٹریلیا نے پاکستانی نڑاد بلے باز عثمان خواجہ کو ٹیسٹ کرکٹ میں شاندار کارکردگی دکھانے پر ہندوستان کے خلاف دوسرے ایک روزہ میچ کے لیے ٹیم میں شامل کرلیا۔عثمان خواجہ نے کرکٹ میں واپسی کرتے ہوئے نیوزی لینڈ اور ویسٹ انڈیز کے خلاف ٹیسٹ میچوں میں سنچریاں بنائی تھیں جبکہ ڈومیسٹک لیگ بگ بیش میں سڈنی تھنڈر کی جانب سے میلبورن اسٹارز کے خلاف جارحانہ 109 رنز کی ناقابل شکست اننگز کھیلی۔انھیں اوپنر ڈیوڈ وارنرکی جگہ آسٹریلوی ٹیم کا حصہ بنایا گیا ہے، وارنر کی دوسری بیٹی کی ولادت متوقع ہے جس کے باعث وہ ٹیم کو دستیاب نہیں ہوں گے۔آسٹریلیا کے چیف سلیکٹر روڈ مارش کا کہنا تھا کہ”عثمان اس سیزن میں شاندار فارم میں ہیں لیکن بدقسمتی سے ایک روزہ سیریز میں وہ ہمارا پہلا انتخاب نہیں تھے”۔ان کا کہنا تھا کہ اب ٹیم میں شمولیت ان کے فارم کا بدلہ ہے اور ڈیوڈ وارنر کی غیرموجودگی میں ان کی صلاحیتوں پر ٹیم میں شمولیت پر بڑی خوشی ہے۔عثمان خواجہ نے آسٹریلیا کی جانب سے ون ڈے ڈیبو 11 جنوری 2013 کو سری لنکا کے خلاف میلبورن میں کیا تھا جبکہ آخری میچ ویسٹ انڈیز کے خلاف 3 فروری 2013 کو کھیلا تھا، 3 ون ڈے میچوں میں انھوں نے 7 کی اوسط سے 14 رنز بنائے۔عثمان خواجہ برسبین میں ہونے والے دوسرے ایک روزہ میچ کے لیے ٹیم کو جوائن کریں گے جبکہ وہ بگ بیش ٹیم سڈنی تھنڈر کے لیے دستیاب نہیں ہوں گے۔دوسری جانب آسٹریلیا نے ٹیم میں ایک اور تبدیلی کی ہے آل راؤنڈر مچل مارش کی جگہ فاسٹ باؤلر جان ہیسٹنگز کو بھی ہندوستان کے خلاف دوسرے میچ کے لیے ٹیم میں منتخب کیا ہے۔پرتھ میں کھیلے گئے سیریز کے پہلے میچ میں آسٹریلیا نے ہندوستان کو 5 وکٹوں سے شکست دی تھی جبکہ دوسرا میچ 15 جنوری کو برسبین میں کھیلا جائے گا۔