لاہور( آن لائن )سعید اجمل کی جانب سے دیئے گئے انٹرویوز میں بھارتی کھلاڑیوں ، آئی سی سی اور پاکستان کرکٹ بورڈ کے رویے پر تنقیدپرپاکستان کرکٹ بورڈ نے سعید اجمل سے جواب طلب کر لیا ہے۔اس سلسلے میں پی سی بی نے قومی کرکٹر کو شوکاز نوٹس جاری کرنے کا فیصلہ کیا ہے۔پاکستان کرکٹ بورڈ اس حوالے سے انہیں کمیٹی کے سامنے پیش ہونے کا کہے گا اگر سعید اجمل کمیٹی کو مطمئن کر پائے تو ٹھیک ورنہ وہ کنٹریکٹ سے محروم ہو سکتے ہیں۔واضح رہے کہ نجی ٹی وی چینلز پر دیئے گئے اپنے انٹرویوز میں سپن کے جادوگر سعید اجمل نے کہا تھا کہ آئی سی سی کا پاکستانی کھلاڑیوں سے رویہ سوتیلی ماں جیسا ہے۔انہوں نے باولنگ ایکشن درست نہ ہونے پر بھارتی کھلاڑیوں کو تنقید کا نشانہ بنانے کے ساتھ ساتھ آئی سی سی کے متعصب رویے اور پی سی بی کے مناسب اقدامات نہ کرنے پر تنقید کی تھی۔سعید اجمل نے اپنے باولنگ ایکشن پر پابندی کے دوران بورڈ کے رویے پر شکوہ بھی کیا تھا۔