لندن (نیوزڈیسک)انگلینڈ میں کھیلے گئے رگبی کے عالمی کپ کے فائنل میں نیوزی لینڈ نے انتہائی دلچسپ مقابلے کے بعد آسٹریلیا کو شکست دے دی ہے۔اس فتح کے نتیجے میں نیوزی لینڈ اس عالمی اعزاز کا کامیابی سے دفاع کرنے والا پہلا ملک بن گیا ہے۔میڈیا رپورٹ کے مطابق لندن کے ٹویکنہیم سٹیڈیم میں کھیلے جانے والے میچ میں بلیک کیپس نے آسٹریلیا کو 17 کے مقابلے میں 34 پوائنٹ سے شکست دی۔دوسرے ہاف کے آغاز میں ایک مرحلے پر نیوزی لینڈ کو اپنے روایتی حریف ہمسایہ ملک پر تین کے مقابلے میں 21 پوائنٹس کی برتری بھی حاصل تھی اور میچ یکطرفہ لگ رہا تھا تاہم پھر آسٹریلیا کی جانب سے میچ میں واپسی ہوئی اور جب آخری 15 منٹ کا کھیل بچا تھا تو دونوں ٹیموں میں فرق صرف چار پوائنٹس کا رہ گیا تھا تاہم نیوزی لینڈ کی ٹیم پھر ایک ڈراپ گول، ڈین کارٹر کی پینلٹی کک اور باو¿ڈن بیرٹ کی ٹرائی کی بدولت اپنی برتری میں اضافہ کرنے میں کامیاب رہی اور نئی تاریخ رقم کرتے ہوئے عالمی چیمپیئن بن گئی۔یہ تیسرا موقع ہے کہ نیوزی لینڈ کی ٹیم رگبی کا عالمی کپ جیتنے میں کامیاب ہوئی ۔تیسری پوزیشن کے میچ میں جنوبی افریقہ نے ارجنٹائن کو شکست دی۔ ٹورنامنٹ میں میزبان انگلینڈ کو ابتدائی مرحلے میں ہی شکست کا سامنا کرنا پڑا تھا اور وہ رگبی کے کسی بھی عالمی کپ کی میزبانی کرنے والا پہلا ملک بنا جو کوارٹر فائنلز مرحلے تک رسائی حاصل نہیں کر سکا۔